kale kapDe nahin pahne hain to itna kar le

kaale kapḌe nahīñ pahne haiñ to itnā kar le

ik zarā der ko kamre meñ añdherā kar le

ab mujhe paar utar jaane de aisā kar le

varna jo aa.e samajh meñ tirī dariyā kar le

ḳhud-ba-ḳhud rāsta de degā ye tūfān mujhe

tujh ko paane kā agar dil ye irāda kar le

aaj kā kaam tujhe aaj hī karnā hogā

kal jo karnā hai to phir aaj taqāzā kar le

ab baḌe logoñ se achchhā.ī kī ummīd na kar

kaise mumkin hai karailā koī mīThā kar le

gar kabhī ronā hī paḌ jaa.e to itnā ronā

aa ke barsāt tire sāmne tauba kar le

muddatoñ ba.ad vo aa.egā hamāre ghar meñ

phir se ai dil kisī ummīd ko zinda kar le

ham-safar lailā bhī hogī maiñ tabhī jā.ūñgā

mujh pe jitne bhī sitam karne hoñ sahrā kar le

kale kapDe nahin pahne hain to itna kar le

ek zara der ko kamre mein andhera kar le

ab mujhe par utar jaane de aisa kar le

warna jo aae samajh mein teri dariya kar le

KHud-ba-KHud rasta de dega ye tufan mujhe

tujh ko pane ka agar dil ye irada kar le

aaj ka kaam tujhe aaj hi karna hoga

kal jo karna hai to phir aaj taqaza kar le

ab baDe logon se achchhai ki ummid na kar

kaise mumkin hai karaila koi miTha kar le

gar kabhi rona hi paD jae to itna rona

aa ke barsat tere samne tauba kar le

muddaton baad wo aaega hamare ghar mein

phir se ai dil kisi ummid ko zinda kar le

ham-safar laila bhi hogi main tabhi jaunga

mujh pe jitne bhi sitam karne hon sahra kar le