sang hai ab jis se meri aabru likkhi gai

sang hai ab jis se merī aabrū likkhī ga.ī

haath jis se us hasīñ kī guftugū likkhī ga.ī

aa.ina nāqis ho jis kā kyā karegā taaza haath

tujh se ab tak kaun sūrat hū-bahū likkhī ga.ī

toḌ do ye uñgliyāñ uThTho gharoñ kī raah lo

ho chukī har dāstāñ har aarzū likkhī ga.ī

tū havā kab thā ki sote meñ tujhe bāñdhā gayā

ye sazā-e-qaid tere rū-barū likkhī ga.ī

har khule sahrā meñ sarmā raat tanhā kaun thā

kis kī hairat kī hikāyat kū-ba-kū likkhī ga.ī

kaun hai maiñ ne kahā jis par thamegī jā ke tū

us havā ne ret par nannhī sī tū likkhī ga.ī

chāñd Tīloñ par na the rāheñ sadā detī na thiiñ

aisī gum rātoñ meñ sharh-e-justujū likkhī ga.ī

shaam phir sarmā ke sehnoñ meñ siyāhī ho ga.ī

phir diloñ meñ us kī ḳhvāhish bā-vuzū likkhī ga.ī

sang hai ab jis se meri aabru likkhi gai

hath jis se us hasin ki guftugu likkhi gai

aaina naqis ho jis ka kya karega taza hath

tujh se ab tak kaun surat hu-bahu likkhi gai

toD do ye ungliyan uThTho gharon ki rah lo

ho chuki har dastan har aarzu likkhi gai

tu hawa kab tha ki sote mein tujhe bandha gaya

ye saza-e-qaid tere ru-baru likkhi gai

har khule sahra mein sarma raat tanha kaun tha

kis ki hairat ki hikayat ku-ba-ku likkhi gai

kaun hai main ne kaha jis par thamegi ja ke tu

us hawa ne ret par nannhi si tu likkhi gai

chand Tilon par na the rahen sada deti na thin

aisi gum raaton mein sharh-e-justuju likkhi gai

sham phir sarma ke sehnon mein siyahi ho gai

phir dilon mein us ki KHwahish ba-wuzu likkhi gai