sahil pe na aa jaun bhanwar mein hi rahun main

sāhil pe na aa jā.ūñ bhañvar meñ hī rahūñ maiñ

tā-'umr tire dīda-e-tar meñ hī rahūñ maiñ

hai merī zarūrat ko safar roz hī darkār

kahtī hai thakan paaoñ kī ghar meñ hī rahūñ maiñ

behtar hai karūñ ḳhud ko ḳhirad ke bhī havāle

kab tak dil-e-nādāñ ke asar meñ hī rahūñ maiñ

kyā is kī zamānat hai ki tū tū hī rahegā

ik 'umr bhī ai dost agar maiñ hī rahūñ maiñ

ik miil ke patthar kī tarah rāh-e-adab meñ

gumnām bhī ho kar ke ḳhabar meñ hī rahūñ maiñ

tū vaqt kā aazar hai to phir maiñ bhī ai 'māhir'

patthar huuñ tire dast-e-hunar meñ hī rahūñ maiñ

sahil pe na aa jaun bhanwar mein hi rahun main

ta-'umr tere dida-e-tar mein hi rahun main

hai meri zarurat ko safar roz hi darkar

kahti hai thakan paon ki ghar mein hi rahun main

behtar hai karun KHud ko KHirad ke bhi hawale

kab tak dil-e-nadan ke asar mein hi rahun main

kya is ki zamanat hai ki tu tu hi rahega

ek 'umr bhi ai dost agar main hi rahun main

ek mil ke patthar ki tarah rah-e-adab mein

gumnam bhi ho kar ke KHabar mein hi rahun main

tu waqt ka aazar hai to phir main bhi ai 'mahir'

patthar hun tere dast-e-hunar mein hi rahun main