had-e-imkan se aage bhi koi imkan hai sahab

had-e-imkāñ se aage bhī koī imkān hai sāhab

mirā honā hī mere hone kā 'unvān hai sāhab

havā ke haath meñ sauñpī hai ham ne Dor sāñsoñ kī

ḳhud apne hī ta'āqub meñ mirā zindān hai sāhab

palaT kar jab bhī dekhā aa.ina hī sāmne paayā

maiñ apne hī muqābil huuñ kaḌā maidān hai sāhab

'ajab sī raushnī hai jo basārat chhīn letī hai

añdherā bhī basārat kā 'ajab sāmān hai sāhab

tumhāre hijr kī bastī meñ rah kar ye khulā ham par

musāfir ke liye har rāsta vīrān hai sāhab

vo jis ko DhūñDne nikle ho tum ab apne andar se

tumhārī 'aas' kā vo āḳhrī imkān hai sāhab

had-e-imkan se aage bhi koi imkan hai sahab

mera hona hi mere hone ka 'unwan hai sahab

hawa ke hath mein saunpi hai hum ne Dor sanson ki

KHud apne hi ta'aqub mein mera zindan hai sahab

palaT kar jab bhi dekha aaina hi samne paya

main apne hi muqabil hun kaDa maidan hai sahab

'ajab si raushni hai jo basarat chhin leti hai

andhera bhi basarat ka 'ajab saman hai sahab

tumhaare hijr ki basti mein rah kar ye khula hum par

musafir ke liye har rasta viran hai sahab

wo jis ko DhunDne nikle ho tum ab apne andar se

tumhaari 'as' ka wo aaKHri imkan hai sahab