dhuan sa jab nazar aaya sawad-e-manzil ka

dhuāñ sā jab nazar aayā savād-e-manzil kā

nigāh-e-shauq se aage thā kārvāñ dil kā

charāġh le ke kise DhūñDte haiñ dīvāne

nishāñ to duur hai yaañ naam tak nahīñ dil kā

na sar meñ nashsha hai baaqī na dil meñ kaifiyyat

zabāñ pe rah gayā ik zikr-e-ḳhair mahfil kā

kabhī to mauj meñ aa.egā terā dīvāna

ishāra chāhiye hai jumbish-e-salāsil kā

ḳhud apnī aag meñ jaltā to kīmiyā hotā

mizāj-dāñ na thā parvāna sham'-e-mahfil kā

azal se apnā safīnā ravāñ hai dhāre par

huā hanūz na girdāb kā na sāhil kā

huzūr-e-dost 'yagānā' kuchh aise ġhā.eb the

zabān-e-gung tak aayā na mājrā dil kā

dhuan sa jab nazar aaya sawad-e-manzil ka

nigah-e-shauq se aage tha karwan dil ka

charagh le ke kise DhunDte hain diwane

nishan to dur hai yan nam tak nahin dil ka

na sar mein nashsha hai baqi na dil mein kaifiyyat

zaban pe rah gaya ek zikr-e-KHair mahfil ka

kabhi to mauj mein aaega tera diwana

ishaara chahiye hai jumbish-e-salasil ka

KHud apni aag mein jalta to kimiya hota

mizaj-dan na tha parwana sham'-e-mahfil ka

azal se apna safina rawan hai dhaare par

hua hanuz na girdab ka na sahil ka

huzur-e-dost 'yagana' kuchh aise ghaeb the

zaban-e-gung tak aaya na majra dil ka