dasht-e-tarab mein gham ka samundar hi le chalen

dasht-e-tarab meñ ġham kā samundar hī le chaleñ

shīsha-garoñ meñ sang-e-muqaddar hī le chaleñ

āġhosh-e-shauq husn se mahrūm hī sahī

āñkhoñ meñ ik shabāb kā manzar hī le chaleñ

haiñ raah meñ nihāl-e-samar-dār bhī bahut

tosha agar nahīñ hai to patthar hī le chaleñ

tasvīr-go miTā na sake bāñhoñ kī ḳhalish

ehsās-e-lams kuchh to laboñ par hī le chaleñ

ġham ke 'ufuq meñ Duub gayā mehr-e-sarḳhushī

shām-e-hayāt se mah-o-aḳhtar hī le chaleñ

toḌe gaye jo maslahatan mai-kade meñ aaj

tishna-labo chalo vahī sāġhar hī le chaleñ

hangāma-hā-e-shauq ko vo bhī taras gaye

gar dil nahīñ hai ab to chalo sar hī le chaleñ

ab ḳhālī un kī bazm se kyā jaa.eñ dosto

be-mehriyoñ ke daaġh chhupā kar hī le chaleñ

kuchh aur to nahīñ ki unheñ nazr kar sakeñ

zaḳhmoñ ke phuul ashkoñ ke gauhar hī le chaleñ

ḳhvāboñ kī aarzū kā kahīñ dil na TuuT jaa.e

TuuTī huī umīdoñ ke patthar hī le chaleñ

aao ki ḳhair-maqdam-e-shabnam ke vāste

sadiyoñ kī tishnagī kā samundar hī le chaleñ

be-chehragī ke shahr meñ pahchān kuchh to ho

naam apnā ek laash pe likh kar hī le chaleñ

parda barahnagī kā to rah jaa.e dosto

gard-e-safar kī jism pe chādar hī le chaleñ

dasht-e-ġham-e-hayāt meñ kho jāoge kahīñ

yādoñ ke taaro aao tumheñ ghar hī le chaleñ

ghuTne lagā hai dam sā hisār-e-badan meñ ab

aao zarā 'na.īmī' ko bāhar hī le chaleñ

dasht-e-tarab mein gham ka samundar hi le chalen

shisha-garon mein sang-e-muqaddar hi le chalen

aaghosh-e-shauq husn se mahrum hi sahi

aankhon mein ek shabab ka manzar hi le chalen

hain rah mein nihaal-e-samar-dar bhi bahut

tosha agar nahin hai to patthar hi le chalen

taswir-go miTa na sake banhon ki KHalish

ehsas-e-lams kuchh to labon par hi le chalen

gham ke 'ufuq mein Dub gaya mehr-e-sarKHushi

sham-e-hayat se mah-o-aKHtar hi le chalen

toDe gaye jo maslahatan mai-kade mein aaj

tishna-labo chalo wahi saghar hi le chalen

hangama-ha-e-shauq ko wo bhi taras gaye

gar dil nahin hai ab to chalo sar hi le chalen

ab KHali un ki bazm se kya jaen dosto

be-mehriyon ke dagh chhupa kar hi le chalen

kuchh aur to nahin ki unhen nazr kar saken

zaKHmon ke phul ashkon ke gauhar hi le chalen

KHwabon ki aarzu ka kahin dil na TuT jae

TuTi hui umidon ke patthar hi le chalen

aao ki KHair-maqdam-e-shabnam ke waste

sadiyon ki tishnagi ka samundar hi le chalen

be-chehragi ke shahr mein pahchan kuchh to ho

nam apna ek lash pe likh kar hi le chalen

parda barahnagi ka to rah jae dosto

gard-e-safar ki jism pe chadar hi le chalen

dasht-e-gham-e-hayat mein kho jaoge kahin

yaadon ke taro aao tumhein ghar hi le chalen

ghuTne laga hai dam sa hisar-e-badan mein ab

aao zara 'naimi' ko bahar hi le chalen