ab tak to nur-o-nighat-o-rang-o-sada kahun

ab tak to nūr-o-nig.hat-o-rang-o-sadā kahūñ

maiñ tujh ko chhū sakūñ to ḳhudā jaane kyā kahūñ

lafzoñ se un ko rabt hai mafhūm se mujhe

vo gul kaheñ jise maiñ tirā naqsh-e-pā kahūñ

sirf is liye ki 'ishq usī kā zuhūr hai

maiñ tere husn ko bhī subūt-e-vafā kahūñ

tū chal diyā to kitne haqā.eq badal gaye

najm-e-sahar ko marqad-e-shab kā diyā kahūñ

ab justujū hai terī jafā ke javāz kī

jī chāhtā hai tujh ko vafā-āshnā kahūñ

kyā jabr hai ki but ko bhī kahnā paḌe ḳhudā

vo hai ḳhudā to mere ḳhudā tujh ko kyā kahūñ

jab mere muñh meñ merī zabāñ hai to kyoñ na maiñ

jo kuchh kahūñ yaqīñ se kahūñ barmalā kahūñ

kyā jaane kis safar pe ravāñ huuñ azal se maiñ

har intihā ko ek na.ī ibtidā kahūñ

ho kyuuñ na mujh ko apne mazāq-e-suḳhan pe naaz

'ġhālib' ko kā.enāt-e-suḳhan kā ḳhudā kahūñ

ab tak to nur-o-nighat-o-rang-o-sada kahun

main tujh ko chhu sakun to KHuda jaane kya kahun

lafzon se un ko rabt hai mafhum se mujhe

wo gul kahen jise main tera naqsh-e-pa kahun

sirf is liye ki 'ishq usi ka zuhur hai

main tere husn ko bhi subut-e-wafa kahun

tu chal diya to kitne haqaeq badal gaye

najm-e-sahar ko marqad-e-shab ka diya kahun

ab justuju hai teri jafa ke jawaz ki

ji chahta hai tujh ko wafa-ashna kahun

kya jabr hai ki but ko bhi kahna paDe KHuda

wo hai KHuda to mere KHuda tujh ko kya kahun

jab mere munh mein meri zaban hai to kyon na main

jo kuchh kahun yaqin se kahun barmala kahun

kya jaane kis safar pe rawan hun azal se main

har intiha ko ek nai ibtida kahun

ho kyun na mujh ko apne mazaq-e-suKHan pe naz

'ghaalib' ko kaenat-e-suKHan ka KHuda kahun