junun se khelte hain aagahi se khelte hain

junūñ se khelte haiñ āgahī se khelte haiñ

yahāñ to ahl-e-suḳhan aadmī se khelte haiñ

nigār-e-mai-kada sab se ziyāda qābil-e-rahm

vo tishna-kām haiñ jo tishnagī se khelte haiñ

tamām umr ye afsurdagān-e-mahfil-e-gul

kalī ko chheḌte haiñ be-kalī se khelte haiñ

farāz-e-ishq nasheb-e-jahāñ se pahle thā

kisī se khel chuke haiñ kisī se khelte haiñ

nahā rahī hai dhanak zindagī ke sañgam par

purāne rañg na.ī raushnī se khelte haiñ

jo khel jānte haiñ un ke aur haiñ andāz

baḌe sukūn baḌī sādgī se khelte haiñ

'ḳhizāñ' kabhī to kaho ek is tarah kī ġhazal

ki jaise raah meñ bachche ḳhushī se khelte haiñ

junun se khelte hain aagahi se khelte hain

yahan to ahl-e-suKHan aadmi se khelte hain

nigar-e-mai-kada sab se ziyaada qabil-e-rahm

wo tishna-kaam hain jo tishnagi se khelte hain

tamam umr ye afsurdagan-e-mahfil-e-gul

kali ko chheDte hain be-kali se khelte hain

faraaz-e-ishq nasheb-e-jahan se pahle tha

kisi se khel chuke hain kisi se khelte hain

naha rahi hai dhanak zindagi ke sangam par

purane rang nai raushni se khelte hain

jo khel jaante hain un ke aur hain andaz

baDe sukun baDi sadgi se khelte hain

'KHizan' kabhi to kaho ek is tarah ki ghazal

ki jaise rah mein bachche KHushi se khelte hain