mujh mein jo bhi hai KHarabi isi tahrir se hai

mujh meñ jo bhī hai ḳharābī isī tahrīr se hai

is daf'a jang mirī kātib-e-taqdīr se hai

jaun se hote hue aa.ī hai ham tak vahshat

silsila jis kā ravāñ miir taqī miir se hai

ab jo āzād kiyā jā.ūñ to mar jā.ūñgā

mujh meñ jo jaan hai baaqī isī zanjīr se hai

ḳhvāb kā kyā hai ye ā.eñge bikhar jā.eñge

mujh ko matlab to faqat ḳhvāb kī tā'bīr se hai

har ghaḌī duniyā se bezār nazar aate haiñ

ho na ho aap kī nisbat to kisī piir se hai

ḳhush huuñ milne to chale aa.e vo mujh se lekin

mas.ala mujh ko magar aaj bhī tāḳhīr se hai

vaisā rishta hai ġhazal se mirā 'az.har-sajjād’

jaisā rishta kisī me'mār kā tā'mīr se hai

mujh mein jo bhi hai KHarabi isi tahrir se hai

is daf'a jang meri katib-e-taqdir se hai

jaun se hote hue aai hai hum tak wahshat

silsila jis ka rawan mir taqi mir se hai

ab jo aazad kiya jaun to mar jaunga

mujh mein jo jaan hai baqi isi zanjir se hai

KHwab ka kya hai ye aaenge bikhar jaenge

mujh ko matlab to faqat KHwab ki ta'bir se hai

har ghaDi duniya se bezar nazar aate hain

ho na ho aap ki nisbat to kisi pir se hai

KHush hun milne to chale aae wo mujh se lekin

masala mujh ko magar aaj bhi taKHir se hai

waisa rishta hai ghazal se mera 'azhar-sajjad’

jaisa rishta kisi me'mar ka ta'mir se hai