shikasta-KHwab ki surat guzari zindagi humne

shikasta-ḳhvāb kī sūrat guzārī zindagī ham ne

na jiine kī ḳhushī paa.ī na maarī zindagī ham ne

tirā milnā na milnā ḳhair ye to baḳht kī shai thī

magar ḳhud se bahut haarī hai haarī zindagī ham ne

jahāñ har moḌ par ik maslahat dīvār bantī thī

vahāñ se bhī nikālī thī hamārī zindagī ham ne

baḌī be-zār sī tahzīb gande log jhūTe qad

'ajab dozaḳh meñ ai jānāñ guzārī zindagī ham ne

sunnā hai hashr meñ hogā hisāb-e-'umr lā-hāsil

to keh deñge ki laa.e the udhārī zindagī ham ne

hazāroñ vasvasoñ ke darmiyāñ ik naam kī ḳhātir

baḌī vahshat meñ thoḌī sī guzārī zindagī ham ne

kabhī ḳhud ko jalā Daalā kabhī pindār-e-hastī meñ

baḌī mushkil se lamhoñ meñ utārī zindagī ham ne

hamāre hijr kā qissa suneñ to ruuh kaañp uTThe

baḌe hī ḳhūnī manzar meñ guzārī zindagī ham ne

yahāñ to apne saa.e se bhī Dar lagne lagā ham ko

kuchh is darja akele meñ guzārī zindagī ham ne

hameñ to yaad bhī ab Thiik se aatā nahīñ kuchh bhī

bas ik dhuñdlī sī hālat meñ guzārī zindagī ham ne

tumhārī yaad kī bhaTTī mirī sāñsoñ kā ye īñdhan

isī tapte hue dukh meñ utārī zindagī ham ne

hamāre haal par duniyā hañsī bhī aur roī bhī

baḌī hī ḳhvār sī 'sāhil' guzārī zindagī ham ne

shikasta-KHwab ki surat guzari zindagi hum ne

na jine ki KHushi pai na mari zindagi hum ne

tera milna na milna KHair ye to baKHt ki shai thi

magar KHud se bahut haari hai haari zindagi hum ne

jahan har moD par ek maslahat diwar banti thi

wahan se bhi nikali thi hamari zindagi hum ne

baDi be-zar si tahzib gande log jhuTe qad

'ajab dozaKH mein ai jaanan guzari zindagi hum ne

sunna hai hashr mein hoga hisab-e-'umr la-hasil

to keh denge ki lae the udhaari zindagi hum ne

hazaron waswason ke darmiyan ek nam ki KHatir

baDi wahshat mein thoDi si guzari zindagi hum ne

kabhi KHud ko jala Dala kabhi pindar-e-hasti mein

baDi mushkil se lamhon mein utari zindagi hum ne

hamare hijr ka qissa sunen to ruh kanp uTThe

baDe hi KHuni manzar mein guzari zindagi hum ne

yahan to apne sae se bhi Dar lagne laga hum ko

kuchh is darja akele mein guzari zindagi hum ne

hamein to yaad bhi ab Thik se aata nahin kuchh bhi

bas ek dhundli si haalat mein guzari zindagi hum ne

tumhaari yaad ki bhaTTi meri sanson ka ye indhan

isi tapte hue dukh mein utari zindagi hum ne

hamare haal par duniya hansi bhi aur roi bhi

baDi hi KHwar si 'sahil' guzari zindagi hum ne