koi KHushi ghami ho main tab yaad aaunga

koī ḳhushī ġhamī ho maiñ tab yaad ā.ūñgā

har haal DhūñD lūñgā sabab yaad ā.ūñgā

sab mausamoñ ko bin mire chāhe guzār lo

barsāt jab bhī aa.egī tab yaad ā.ūñgā

kho.egā jab jahān hasīnoñ kī bhiiḌ meñ

maiñ chāñd koī aisī hī shab yaad ā.ūñgā

āñkhoñ meñ le chhupā ki ḳhayāloñ meñ dafn kar

ban kar maiñ ek ḳhvāb-e-tarab yaad ā.ūñgā

tū yaad kar na kar mujhe ye to gavārā hai

sochegā jab tū ġhair ko tab yaad ā.ūñgā

aisī bhī mere dost farāġhat nahīñ mujhe

baiThā huuñ intizār meñ kab yaad ā.ūñgā

yuuñ ho ke ḳhush-gumān guzārī hai zindagī

jab yaad ā.ūñgā to ġhazab yaad ā.ūñgā

kab tak guzāroge yahāñ auroñ kī zindagī

jab hogī tum ko apnī talab yaad ā.ūñgā

ḳhush-fahmī kā ye silsila 'abrak' darāz hai

uTh jā.ūñgā jahāñ se maiñ tab yaad ā.ūñgā

koi KHushi ghami ho main tab yaad aaunga

har haal DhunD lunga sabab yaad aaunga

sab mausamon ko bin mere chahe guzar lo

barsat jab bhi aaegi tab yaad aaunga

khoega jab jahan hasinon ki bhiD mein

main chand koi aisi hi shab yaad aaunga

aankhon mein le chhupa ki KHayalon mein dafn kar

ban kar main ek KHwab-e-tarab yaad aaunga

tu yaad kar na kar mujhe ye to gawara hai

sochega jab tu ghair ko tab yaad aaunga

aisi bhi mere dost faraghat nahin mujhe

baiTha hun intizar mein kab yaad aaunga

yun ho ke KHush-guman guzari hai zindagi

jab yaad aaunga to ghazab yaad aaunga

kab tak guzaroge yahan auron ki zindagi

jab hogi tum ko apni talab yaad aaunga

KHush-fahmi ka ye silsila 'abrak' daraaz hai

uTh jaunga jahan se main tab yaad aaunga