kitni be-nur thi din bhar nazar-e-parwana

kitnī be-nūr thī din bhar nazar-e-parvāna

raat aa.ī to huī hai sahar-e-parvāna

sham.a jalte hī yahāñ hashr kā manzar hogā

phir koī pā na sakegā ḳhabar-e-parvāna

bujh ga.ī sham.a kaTī raat ga.ī sab mahfil

ab akele hī kaTegā safar-e-parvāna

raat bhar bazm meñ hañgāma hī hañgāma thā

sirf ḳhāmoshī hai ab nauha-gar-e-parvāna

saarī maḳhlūq tamāshe ke liye aa.ī thī

kaun thā sīkhne vaalā hunar-e-parvāna

āsmāñ surḳh hai sūraj bhī abhī Duubā hai

abhī raushan na karo rahguzar-e-parvāna

na sahī jism magar ḳhaak to uḌtī phirtī

kaash jalte na kabhī bāl-o-par-e-parvāna

sham.a kyā chiiz hai jaltī to kahāñ tak jaltī

abhī zinda hai dil-e-be-ḳhatar-e-parvāna

haa.e vo husn ki jis kā koī mushtāq nahīñ

haa.e vo sham.a ki hai be-ḳhabar-e-parvāna

jis tarah guzregī ye raat guzar jā.egī

muddatoñ yaad rahegā asar-e-parvāna

ek hī jast meñ tai ho ga.ī manzil 'shahzād'

kitne ārām se guzrā safar-e-parvāna

kitni be-nur thi din bhar nazar-e-parwana

raat aai to hui hai sahar-e-parwana

shama jalte hi yahan hashr ka manzar hoga

phir koi pa na sakega KHabar-e-parwana

bujh gai shama kaTi raat gai sab mahfil

ab akele hi kaTega safar-e-parwana

raat bhar bazm mein hangama hi hangama tha

sirf KHamoshi hai ab nauha-gar-e-parwana

sari maKHluq tamashe ke liye aai thi

kaun tha sikhne wala hunar-e-parwana

aasman surKH hai suraj bhi abhi Duba hai

abhi raushan na karo rahguzar-e-parwana

na sahi jism magar KHak to uDti phirti

kash jalte na kabhi baal-o-par-e-parwana

shama kya chiz hai jalti to kahan tak jalti

abhi zinda hai dil-e-be-KHatar-e-parwana

hae wo husn ki jis ka koi mushtaq nahin

hae wo shama ki hai be-KHabar-e-parwana

jis tarah guzregi ye raat guzar jaegi

muddaton yaad rahega asar-e-parwana

ek hi jast mein tai ho gai manzil 'shahzad'

kitne aaram se guzra safar-e-parwana