jo usne kiya use sila de

jo us ne kiyā use sila de

maulā mujhe sabr kī jazā de

yā mere diye kī lau baḌhā de

yā raat ko sub.h se milā de

sach huuñ to mujhe amar banā de

jhūTā huuñ to naqsh sab miTā de

ye qaum ajiib ho ga.ī hai

is qaum ko ḳhū-e-ambiyā de

utregā na koī āsmāñ se

ik aas meñ dil magar sadā de

bachchoñ kī tarah ye lafz mere

ma.abūd inheñ bolnā sikhā de

dukh dahr ke apne naam likkhūñ

har dukh mujhe zaat kā mazā de

ik merā vajūd sun rahā hai

ilhām jo raat kī havā de

mujh se mirā koī milne vaalā

bichhḌā to nahīñ magar milā de

chehra mujhe apnā dekhne ko

ab dast-e-havas meñ ā.īna de

jis shaḳhs ne umar-e-hijr kaaTī

us shaḳhs ko ek raat kyā de

dukhtā hai badan ki phir mile vo

mil jaa.e to ruuh ko dikhā de

kyā chiiz hai ḳhvāhish-e-badan bhī

har baar nayā hī zā.iqa de

chhūne meñ ye Dar ki mar na jā.ūñ

chhū luuñ to vo zindagī sivā de

jo us ne kiya use sila de

maula mujhe sabr ki jaza de

ya mere diye ki lau baDha de

ya raat ko subh se mila de

sach hun to mujhe amar bana de

jhuTa hun to naqsh sab miTa de

ye qaum ajib ho gai hai

is qaum ko KHu-e-ambiya de

utrega na koi aasman se

ek aas mein dil magar sada de

bachchon ki tarah ye lafz mere

mabud inhen bolna sikha de

dukh dahr ke apne nam likkhun

har dukh mujhe zat ka maza de

ek mera wajud sun raha hai

ilham jo raat ki hawa de

mujh se mera koi milne wala

bichhDa to nahin magar mila de

chehra mujhe apna dekhne ko

ab dast-e-hawas mein aaina de

jis shaKHs ne umar-e-hijr kaTi

us shaKHs ko ek raat kya de

dukhta hai badan ki phir mile wo

mil jae to ruh ko dikha de

kya chiz hai KHwahish-e-badan bhi

har bar naya hi zaiqa de

chhune mein ye Dar ki mar na jaun

chhu lun to wo zindagi siwa de