jis bazm mein tu naz se guftar mein aawe

jis bazm meñ tū naaz se guftār meñ aave

jaañ kālbad-e-sūrat-e-dīvār meñ aave

saa.e kī tarah saath phireñ sarv o sanobar

tū is qad-e-dilkash se jo gulzār meñ aave

tab nāz-e-girāñ mā.igi-e-ashk bajā hai

jab laḳht-e-jigar dīda-e-ḳhūñ-bār meñ aave

de mujh ko shikāyat kī ijāzat ki sitamgar

kuchh tujh ko mazā bhī mire āzār meñ aave

us chashm-e-fusūñ-gar kā agar paa.e ishāra

tuutī kī tarah aa.ina guftār meñ aave

kāñToñ kī zabāñ suukh ga.ī pyaas se yā rab

ik ābla-pā vādī-e-pur-ḳhār meñ aave

mar jā.ūñ na kyuuñ rashk se jab vo tan-e-nāzuk

āġhosh-e-ḳham-e-halqa-e-zunnār meñ aave

ġhārat-gar-e-nāmūs na ho gar havas-e-zar

kyuuñ shāhid-e-gul baaġh se bāzār meñ aave

tab chāk-e-garebāñ kā mazā hai dil-e-nālāñ

jab ik nafas uljhā huā har taar meñ aave

ātish-kada hai siina mirā rāz-e-nihāñ se

ai vaa.e agar ma.ariz-e-iz.hār meñ aave

ganjīna-e-ma.anī kā tilism us ko samajhiye

jo lafz ki 'ġhālib' mire ash.ār meñ aave

jis bazm mein tu naz se guftar mein aawe

jaan kalbad-e-surat-e-diwar mein aawe

sae ki tarah sath phiren sarw o sanobar

tu is qad-e-dilkash se jo gulzar mein aawe

tab naz-e-giran maigi-e-ashk baja hai

jab laKHt-e-jigar dida-e-KHun-bar mein aawe

de mujh ko shikayat ki ijazat ki sitamgar

kuchh tujh ko maza bhi mere aazar mein aawe

us chashm-e-fusun-gar ka agar pae ishaara

tuti ki tarah aaina guftar mein aawe

kanTon ki zaban sukh gai pyas se ya rab

ek aabla-pa wadi-e-pur-KHar mein aawe

mar jaun na kyun rashk se jab wo tan-e-nazuk

aaghosh-e-KHam-e-halqa-e-zunnar mein aawe

ghaarat-gar-e-namus na ho gar hawas-e-zar

kyun shahid-e-gul bagh se bazar mein aawe

tab chaak-e-gareban ka maza hai dil-e-nalan

jab ek nafas uljha hua har tar mein aawe

aatish-kada hai sina mera raaz-e-nihan se

ai wae agar mariz-e-izhaar mein aawe

ganjina-e-mani ka tilism us ko samajhiye

jo lafz ki 'ghaalib' mere ashaar mein aawe