jhuTi hi tasalli ho kuchh dil to bahal jae

jhūTī hī tasallī ho kuchh dil to bahal jaa.e

dhuñdlī hī sahī lekin ik sham.a to jal jaa.e

is mauj kī Takkar se sāhil bhī laraztā hai

kuchh roz to tūfāñ kī āġhosh meñ pal jaa.e

majbūri-e-sāqī bhī ai tishna-labo samjho

vaa.iz kā ye manshā hai mai-ḳhvāroñ meñ chal jaa.e

ai jalva-e-jānāna phir aisī jhalak dikhlā

hasrat bhī rahe baaqī armāñ bhī nikal jaa.e

is vāste chheḌā hai parvānoñ kā afsāna

shāyad tire kānoñ tak paiġhām-e-amal jaa.e

mai-ḳhāna-e-hastī meñ mai-kash vahī mai-kash hai

sañbhle to bahak jaa.e bahke to sañbhal jaa.e

ham ne to 'fanā' itnā mafhūm-e-ġhazal samjhā

ḳhud zindagī-e-shā'ir ash.ār meñ Dhal jaa.e

jhuTi hi tasalli ho kuchh dil to bahal jae

dhundli hi sahi lekin ek shama to jal jae

is mauj ki Takkar se sahil bhi larazta hai

kuchh roz to tufan ki aaghosh mein pal jae

majburi-e-saqi bhi ai tishna-labo samjho

waiz ka ye mansha hai mai-KHwaron mein chal jae

ai jalwa-e-jaanana phir aisi jhalak dikhla

hasrat bhi rahe baqi arman bhi nikal jae

is waste chheDa hai parwanon ka afsana

shayad tere kanon tak paigham-e-amal jae

mai-KHana-e-hasti mein mai-kash wahi mai-kash hai

sanbhle to bahak jae bahke to sanbhal jae

hum ne to 'fana' itna mafhum-e-ghazal samjha

KHud zindagi-e-sha'ir ashaar mein Dhal jae