makr-o-fareb zulmat-e-shab-gir ka jawab

makr-o-fareb zulmat-e-shab-gīr kā javāb

denā paḌegā jhuuT kī tash.hīr kā javāb

qāsid ko ḳhat thamā ke isī soch meñ huuñ gum

likkheñge kyā vo ab mirī tahrīr kā javāb

e'lān karke tark-e-ta'alluq kā mujh se aap

kyuuñ pūchhte haiñ hālat-e-dil-gīr kā javāb

māñgegī tum se nasl jo aa.egī tere baa'd

kho.e hue vaqār kā tauqīr kā javāb

ye bazm bazm-e-'ām nahīñ bazm-e-yār hai

denā paḌegā aap ko tāḳhīr kā javāb

har vaar kā javāb hai lekin tirī nigāh

tarkash meñ mere hai nahīñ is tiir kā javāb

'mushtāq' kam nahīñ kisī shamshīr se qalam

dete haiñ ham qalam se hī shamshīr kā javāb

makr-o-fareb zulmat-e-shab-gir ka jawab

dena paDega jhuT ki tashhir ka jawab

qasid ko KHat thama ke isi soch mein hun gum

likkhenge kya wo ab meri tahrir ka jawab

e'lan karke tark-e-ta'alluq ka mujh se aap

kyun puchhte hain haalat-e-dil-gir ka jawab

mangegi tum se nasl jo aaegi tere ba'd

khoe hue waqar ka tauqir ka jawab

ye bazm bazm-e-'am nahin bazm-e-yar hai

dena paDega aap ko taKHir ka jawab

har war ka jawab hai lekin teri nigah

tarkash mein mere hai nahin is tir ka jawab

'mushtaq' kam nahin kisi shamshir se qalam

dete hain hum qalam se hi shamshir ka jawab