jalwa-numai be-parwai han yahi rit jahan ki hai

jalva-numā.ī be-parvā.ī haañ yahī riit jahāñ kī hai

kab koī laḌkī man kā darīcha khol ke bāhar jhāñkī hai

aaj magar ik naar ko dekhā jaane ye naar kahāñ kī hai

misr kī mūrat chiin kī guḌiyā devī hindostāñ kī hai

mukh par ruup se dhuup kā aalam baal añdherī shab kī misāl

aañkh nashīlī baat rasīlī chaal balā kī bāñkī hai

'inshā'-jī use rok ke pūchheñ tum ko to muft milā hai husn

kis liye phir bāzār-e-vafā meñ tum ne ye jins girāñ kī hai

ek zarā sā gosha de do apne paas jahāñ se duur

is bastī meñ ham logoñ ko hājat ek makāñ kī hai

ahl-e-ḳhirad tādīb kī ḳhātir pāthar le le aa pahuñche

jab kabhī ham ne shahr-e-ġhazal meñ dil kī baat bayāñ kī hai

mulkoñ mulkoñ shahroñ shahroñ jogī ban kar ghūmā kaun

qarya-ba-qarya sahrā-ba-sahrā ḳhaak ye kis ne phāñkī hai

ham se jis ke taur hoñ baabā dekhoge do ek hī aur

kahne ko to shahr-e-karachi bastī dil-zadagāñ kī hai

jalwa-numai be-parwai han yahi rit jahan ki hai

kab koi laDki man ka daricha khol ke bahar jhanki hai

aaj magar ek nar ko dekha jaane ye nar kahan ki hai

misr ki murat chin ki guDiya dewi hindostan ki hai

mukh par rup se dhup ka aalam baal andheri shab ki misal

aankh nashili baat rasili chaal bala ki banki hai

'insha'-ji use rok ke puchhen tum ko to muft mila hai husn

kis liye phir bazar-e-wafa mein tum ne ye jins giran ki hai

ek zara sa gosha de do apne pas jahan se dur

is basti mein hum logon ko hajat ek makan ki hai

ahl-e-KHirad tadib ki KHatir pathar le le aa pahunche

jab kabhi hum ne shahr-e-ghazal mein dil ki baat bayan ki hai

mulkon mulkon shahron shahron jogi ban kar ghuma kaun

qarya-ba-qarya sahra-ba-sahra KHak ye kis ne phanki hai

hum se jis ke taur hon baba dekhoge do ek hi aur

kahne ko to shahr-e-karachi basti dil-zadagan ki hai