jab kabhi kisi gul par ek zara nikhaar aaya

jab kabhī kisī gul par ik zarā nikhār aayā

kam-nigāh ye samjhe mausam-e-bahār aayā

husn o 'ishq donoñ the be-karāñ o be-pāyāñ

dil vahāñ bhī kuchh lamhe jaane kab guzār aayā

us ufuq ko kyā kahiye nuur bhī dhuñdalkā bhī

bār-hā kiran phūTī bār-hā ġhubār aayā

ham ne ġham ke māroñ kī mahfileñ bhī dekhīñ haiñ

ek ġham-gusār uThā ek ġham-gusār aayā

ārzū-e-sāhil se ham kinārā kyā karte

jis taraf qadam uTThe bahr-e-be-kanār aayā

yuuñ to saikḌoñ ġham the par ġham-e-jahāñ 'jazbī'

baa'd ek muddat ke dil ko sāzgār aayā

jab kabhi kisi gul par ek zara nikhaar aaya

kam-nigah ye samjhe mausam-e-bahaar aaya

husn o 'ishq donon the be-karan o be-payan

dil wahan bhi kuchh lamhe jaane kab guzar aaya

us ufuq ko kya kahiye nur bhi dhundalka bhi

bar-ha kiran phuTi bar-ha ghubar aaya

hum ne gham ke maron ki mahfilen bhi dekhin hain

ek gham-gusar uTha ek gham-gusar aaya

aarzu-e-sahil se hum kinara kya karte

jis taraf qadam uTThe bahr-e-be-kanar aaya

yun to saikDon gham the par gham-e-jahan 'jazbi'

ba'd ek muddat ke dil ko sazgar aaya