jaan jaane ko hai aur raqs mein parwana hai

jaan jaane ko hai aur raqs meñ parvāna hai

kitnā rañgīn mohabbat tirā afsāna hai

ye to dekhā ki mire haath meñ paimāna hai

ye na dekhā ki ġham-e-ishq ko samjhānā hai

itnā nazdīk hue tark-e-ta.alluq kī qasam

jo kahānī hai mirī aap kā afsāna hai

ham nahīñ vo ki bhulā deñ tire ehsān-o-karam

ik ināyat tirā ḳhvāboñ meñ chalā aanā hai

ek mahshar se nahīñ kam tirā aanā lekin

ik qayāmat tirā pahlū se chalā jaanā hai

ḳhum o miinā mai o mastī ye gulābī āñkheñ

kitnā pur-kaif mire hijr kā afsāna hai

jaan jaane ko hai aur raqs mein parwana hai

kitna rangin mohabbat tera afsana hai

ye to dekha ki mere hath mein paimana hai

ye na dekha ki gham-e-ishq ko samjhana hai

itna nazdik hue tark-e-talluq ki qasam

jo kahani hai meri aap ka afsana hai

hum nahin wo ki bhula den tere ehsan-o-karam

ek inayat tera KHwabon mein chala aana hai

ek mahshar se nahin kam tera aana lekin

ek qayamat tera pahlu se chala jaana hai

KHum o mina mai o masti ye gulabi aankhen

kitna pur-kaif mere hijr ka afsana hai