itna to jaante hain ki bande KHuda ke hain

itnā to jānte haiñ ki bande ḳhudā ke haiñ

aage havās gum ḳhirad-e-nā-rasā ke haiñ

mamnūn-e-barg-e-gul haiñ na sharminda-e-sabā

ham bulbul aur hī chaman-e-dil-kushā ke haiñ

kyā kohkan kī koh-kanī kyā junūn-e-qais

vādī-e-ishq meñ ye maqām ibtidā ke haiñ

bunyān-e-umr sust hai aur mun.imān-e-dahr

maġhrūr apne ko shak-e-ālī binā ke haiñ

apne vajūd kā abhī uqda khulā nahīñ

masrūf hill-o-aqd maiñ arz-o-samā ke haiñ

shaiḳh aur barhaman meñ agar laag hai to ho

donoñ shikār-e-ġhamza usī dil-rubā ke haiñ

jin ko ināyat-e-azalī se hai chashm-dāsht

vo mo'taqid duā ke na qaa.el davā ke haiñ

laayā nahīñ hunūz naved-e-visāl-e-dost

ham shikva-sanj sustī-e-paik-e-sabā ke haiñ

samjho agar to haiñ vahī sab se harīs-tar

tālib ḳhudā se jo dil-e-be-mudda.ā ke haiñ

un bad-diloñ ne ishq ko bad-nām kar diyā

jo murtakib shikāyat-e-jaur-o-jafā ke haiñ

himmat humā-e-auj-e-sa.ādat hai mard ko

ullū haiñ vo jo shefta zill-e-humā ke haiñ

hai ashk-o-āh raas hamāre mizāj ko

ya.anī pale hue isī āb-o-havā ke haiñ

jo bāñdhte haiñ turra-e-tarrār kā ḳhayāl

nādāñ umīd-vār nuzūl-e-balā ke haiñ

khaTkā bhī kuchh huā nahīñ aur dil uḌā liyā

ye saare hathkañDe tirī zulf-e-dotā ke haiñ

said-e-karishma is liye hote nahīñ ki ham

pahle se zaḳhm-ḳhurda fareb-e-vafā ke haiñ

maarā bhī aur maar ke zinda bhī kar diyā

ye sho.abde to shoḳhī-e-nāz-o-adā ke haiñ

ḳhalvat meñ bhī ravā nahīñ gustāḳhi-e-nigāh

parde paḌe hue abhī sharm-o-hayā ke haiñ

yuuñ kah rahī hai nargis-e-bīmār kī adā

nusḳhe to mujh ko yaad hazāroñ shifā ke haiñ

ab tak hai sajda-gāh-e-azīzān-e-rozgār

jis ḳhaak par nishān tire kafsh-e-pā ke haiñ

andesha hai ki de na idhar kī udhar lagā

mujh ko to nā-pasand vatīre sabā ke haiñ

sair-e-varūd-e-qāfila-e-nau-bahār dekh

barpā ḳhiyām auj-e-havā meñ ghaTā ke haiñ

jaatā hai ḳhāk-e-pāk-e-deccan ko ye reḳhta

vaañ qadr-dān is guhar-e-be-bahā ke haiñ

ahbāb kā karam hai agar nukta-chīñ na hoñ

varna ham aap mo'tarif apnī ḳhatā ke haiñ

itna to jaante hain ki bande KHuda ke hain

aage hawas gum KHirad-e-na-rasa ke hain

mamnun-e-barg-e-gul hain na sharminda-e-saba

hum bulbul aur hi chaman-e-dil-kusha ke hain

kya kohkan ki koh-kani kya junun-e-qais

wadi-e-ishq mein ye maqam ibtida ke hain

bunyan-e-umr sust hai aur muniman-e-dahr

maghrur apne ko shak-e-ali bina ke hain

apne wajud ka abhi uqda khula nahin

masruf hill-o-aqd main arz-o-sama ke hain

shaiKH aur barhaman mein agar lag hai to ho

donon shikar-e-ghamza usi dil-ruba ke hain

jin ko inayat-e-azali se hai chashm-dasht

wo mo'taqid dua ke na qael dawa ke hain

laya nahin hunuz nawed-e-visal-e-dost

hum shikwa-sanj susti-e-paik-e-saba ke hain

samjho agar to hain wahi sab se haris-tar

talib KHuda se jo dil-e-be-muddaa ke hain

un bad-dilon ne ishq ko bad-nam kar diya

jo murtakib shikayat-e-jaur-o-jafa ke hain

himmat huma-e-auj-e-saadat hai mard ko

ullu hain wo jo shefta zill-e-huma ke hain

hai ashk-o-ah ras hamare mizaj ko

yani pale hue isi aab-o-hawa ke hain

jo bandhte hain turra-e-tarrar ka KHayal

nadan umid-war nuzul-e-bala ke hain

khaTka bhi kuchh hua nahin aur dil uDa liya

ye sare hathkanDe teri zulf-e-dota ke hain

said-e-karishma is liye hote nahin ki hum

pahle se zaKHm-KHurda fareb-e-wafa ke hain

mara bhi aur mar ke zinda bhi kar diya

ye shoabde to shoKHi-e-naz-o-ada ke hain

KHalwat mein bhi rawa nahin gustaKHi-e-nigah

parde paDe hue abhi sharm-o-haya ke hain

yun kah rahi hai nargis-e-bimar ki ada

nusKHe to mujh ko yaad hazaron shifa ke hain

ab tak hai sajda-gah-e-azizan-e-rozgar

jis KHak par nishan tere kafsh-e-pa ke hain

andesha hai ki de na idhar ki udhar laga

mujh ko to na-pasand watire saba ke hain

sair-e-warud-e-qafila-e-nau-bahaar dekh

barpa KHiyam auj-e-hawa mein ghaTa ke hain

jata hai KHak-e-pak-e-deccan ko ye reKHta

wan qadr-dan is guhar-e-be-baha ke hain

ahbab ka karam hai agar nukta-chin na hon

warna hum aap mo'tarif apni KHata ke hain