ishaaraton ki wo sharhen wo tajziya bhi gaya

ishāratoñ kī vo sharheñ vo tajziya bhī gayā

jo gird-e-matn banā thā vo hāshiya bhī gayā

vo dil-rubā se jo sapne the le uḌiiñ nīñdeñ

dhanak-nagar se vo dhuñdlā sā rābta bhī gayā

'ajīb lutf thā nādāniyoñ ke 'ālam meñ

samajh meñ aa.iiñ to bātoñ kā vo maza bhī gayā

hameñ bhī banñe sañvarne kā dhyān rahtā thā

vo ek shaḳhs ki thā ek ā.īna bhii, gayā

baḌā sukūn milā aaj us ke milne se

chalo ye dil se tavaqqo' kā vasvasa bhī gayā

guloñ ko dekh ke ab raakh yaad aatī hai

ḳhayāl kā vo suhānā talāzma bhī gayā

musāfirat pe maiñ teshe ke sañg niklā thā

jidhar gayā huuñ mire saath rāsta bhī gayā

hameñ to ek nazar nashr kar ga.ī 'anvar'

hamāre haath se dil kā musavvada bhī gayā

ishaaraton ki wo sharhen wo tajziya bhi gaya

jo gird-e-matn bana tha wo hashiya bhi gaya

wo dil-ruba se jo sapne the le uDin ninden

dhanak-nagar se wo dhundla sa rabta bhi gaya

'ajib lutf tha nadaniyon ke 'alam mein

samajh mein aain to baaton ka wo maza bhi gaya

hamein bhi banne sanwarne ka dhyan rahta tha

wo ek shaKHs ki tha ek aaina bhi, gaya

baDa sukun mila aaj us ke milne se

chalo ye dil se tawaqqo' ka waswasa bhi gaya

gulon ko dekh ke ab rakh yaad aati hai

KHayal ka wo suhana talazma bhi gaya

musafirat pe main teshe ke sang nikla tha

jidhar gaya hun mere sath rasta bhi gaya

hamein to ek nazar nashr kar gai 'anwar'

hamare hath se dil ka musawwada bhi gaya