is ka gila nahin ki dua be-asar gai

is kā gila nahīñ ki duā be-asar ga.ī

ik aah kī thī vo bhī kahīñ jā ke mar ga.ī

ai ham-nafas na pūchh javānī kā mājrā

mauj-e-nasīm thī idhar aa.ī udhar ga.ī

dām-e-ġham-e-hayāt meñ uljhā ga.ī umiid

ham ye samajh rahe the ki ehsān kar ga.ī

is zindagī se ham ko na duniyā milī na diiñ

taqdīr kā mushāhida karte guzar ga.ī

anjām-e-fasl-e-gul pe nazar thī vagarna kyuuñ

gulshan se aah bhar ke nasīm-e-sahar ga.ī

bas itnā hosh thā mujhe roz-e-vidā-e-dost

vīrāna thā nazar meñ jahāñ tak nazar ga.ī

har maujh-e-āb-e-sindh huī vaqf-e-pech-o-tāb

'mahrūm' jab vatan meñ hamārī ḳhabar ga.ī

is ka gila nahin ki dua be-asar gai

ek aah ki thi wo bhi kahin ja ke mar gai

ai ham-nafas na puchh jawani ka majra

mauj-e-nasim thi idhar aai udhar gai

dam-e-gham-e-hayat mein uljha gai umid

hum ye samajh rahe the ki ehsan kar gai

is zindagi se hum ko na duniya mili na din

taqdir ka mushahida karte guzar gai

anjam-e-fasl-e-gul pe nazar thi wagarna kyun

gulshan se aah bhar ke nasim-e-sahar gai

bas itna hosh tha mujhe roz-e-wida-e-dost

virana tha nazar mein jahan tak nazar gai

har maujh-e-ab-e-sindh hui waqf-e-pech-o-tab

'mahrum' jab watan mein hamari KHabar gai