sabaat bahr-e-jahan mein apna faqat misal-e-habab dekha

sabāt bahr-e-jahāñ meñ apnā faqat misāl-e-habāb dekhā

na josh dekhā na shor dekhā na mauj dekhī na aab dekhā

surūr meñ jis se jān-e-mahzūñ usī ko gardish vahī hai pur-ḳhūñ

ki charḳh-zan misl-e-daur-e-gardūñ mudām jām-e-sharāb dekhā

hamārī āñkhoñ ne bhī tamāsha 'ajab 'ajab intiḳhāb dekhā

burā.ī dekhī bhalā.ī dekhī 'azāb dekhā savāb dekhā

na dil hī Thahrā na aañkh jhapkī na chain paayā na ḳhvāb dekhā

ḳhudā dikhā.e na dushmanoñ ko jo dostī meñ 'azāb dekhā

nazar meñ hai terī kibriyā.ī samā ga.ī terī ḳhud-numā.ī

agarche dekhī hai sab ḳhudā.ī magar na terā javāb dekhā

paḌe hue the hazāroñ parde kalīm dekho to jab bhī ġhash the

ham us kī āñkhoñ ke sadqe jis ne vo jalva yuuñ be-naqāb dekhā

jo raah meñ terī aa ke baiThe vo fikr-e-dair-o-haram se chhūTe

ki tere kūche ke sākinoñ ne bahisht meñ bhī 'azāb dekhā

ye dil to ai 'ishq ghar hai terā ki jis ko tū ne bigāḌ Daalā

makān se lā-makāñ jo dekhā tujhī ko ḳhāna-ḳharāb dekhā

surūr-e-'aish-o-nashāt kaisā badal gayā rang hī jahāñ kā

sunā na thā kaan se jo ham ne vo aañkh se inqalāb dekhā

sharāb-e-ġhaflat se 'dāġh' ġhash thā dikhā.e ġhaflat ne kyā tamāshe

ki sote sote jo chauñk uTThe magar koī tum ne ḳhvāb dekhā

sabaat bahr-e-jahan mein apna faqat misal-e-habab dekha

na josh dekha na shor dekha na mauj dekhi na aab dekha

surur mein jis se jaan-e-mahzun usi ko gardish wahi hai pur-KHun

ki charKH-zan misl-e-daur-e-gardun mudam jam-e-sharab dekha

hamari aankhon ne bhi tamasha 'ajab 'ajab intiKHab dekha

burai dekhi bhalai dekhi 'azab dekha sawab dekha

na dil hi Thahra na aankh jhapki na chain paya na KHwab dekha

KHuda dikhae na dushmanon ko jo dosti mein 'azab dekha

nazar mein hai teri kibriyai sama gai teri KHud-numai

agarche dekhi hai sab KHudai magar na tera jawab dekha

paDe hue the hazaron parde kalim dekho to jab bhi ghash the

hum us ki aankhon ke sadqe jis ne wo jalwa yun be-naqab dekha

jo rah mein teri aa ke baiThe wo fikr-e-dair-o-haram se chhuTe

ki tere kuche ke sakinon ne bahisht mein bhi 'azab dekha

ye dil to ai 'ishq ghar hai tera ki jis ko tu ne bigaD Dala

makan se la-makan jo dekha tujhi ko KHana-KHarab dekha

surur-e-'aish-o-nashat kaisa badal gaya rang hi jahan ka

suna na tha kan se jo hum ne wo aankh se inqalab dekha

sharab-e-ghaflat se 'dagh' ghash tha dikhae ghaflat ne kya tamashe

ki sote sote jo chaunk uTThe magar koi tum ne KHwab dekha