iblagh ke badan mein tajassus ka silsila

iblāġh ke badan meñ tajassus kā silsila

TuuTā hai chashm-e-ḳhvāb meñ hairat kā aa.ina

jo āsmān ban ke musallat saroñ pe thā

kis ne use zamīn ke andar dhañsā diyā

bikhrī haiñ piilī ret pe sūraj kī haDDiyāñ

zarroñ ke intizār meñ lamhoñ kā jhūmnā

ehrām TūTte haiñ kahāñ sañg-e-vaqt ke

sahrā kī tishnagī meñ abul-haul hañs paḌā

uñglī se us ke jism pe likkhā usī kā naam

phir battī band kar ke use DhūñDtā rahā

shiryāneñ khiñch ke TuuT na jaa.eñ tanāv se

miTTī pe khul na jaa.e ye darvāza ḳhuun kā

maujeñ thiiñ sho.alagī ke samundar meñ tund-o-tez

maiñ raat bhar ubhartā rahā Dūbtā rahā

alfāz kī ragoñ se ma.ānī nichoḌ le

fāsid mavād kāġhzī ghoḌe pe Daal aa

iblagh ke badan mein tajassus ka silsila

TuTa hai chashm-e-KHwab mein hairat ka aaina

jo aasman ban ke musallat saron pe tha

kis ne use zamin ke andar dhansa diya

bikhri hain pili ret pe suraj ki haDDiyan

zarron ke intizar mein lamhon ka jhumna

ehram TuTte hain kahan sang-e-waqt ke

sahra ki tishnagi mein abul-haul hans paDa

ungli se us ke jism pe likkha usi ka nam

phir batti band kar ke use DhunDta raha

shiryanen khinch ke TuT na jaen tanaw se

miTTi pe khul na jae ye darwaza KHun ka

maujen thin shoalagi ke samundar mein tund-o-tez

main raat bhar ubharta raha Dubta raha

alfaz ki ragon se maani nichoD le

fasid mawad kaghzi ghoDe pe Dal aa