hisab-e-tark-talluq tamam maine kiya

hisāb-e-tark-ta.alluq tamām maiñ ne kiyā

shurūa us ne kiyā iḳhtitām maiñ ne kiyā

mujhe bhī tark-e-mohabbat pe hairateñ haiñ rahīñ

jo kaam merā nahīñ thā vo kaam maiñ ne kiyā

vo chāhtā thā ki dekhe mujhe bikharte hue

so us kā jashn ba-sad-ehtimām maiñ ne kiyā

bahut dinoñ mire chehre pe kirchiyāñ sī rahīñ

shikast-e-zāt ko ā.īna-fām maiñ ne kiyā

bahut dinoñ meñ mire ghar kī ḳhāmoshī TuuTī

ḳhud apne-āp se ik din kalām maiñ ne kiyā

ḳhudā-e-zabt ne mausam pe qudtareñ baḳhshīñ

ġhubār-e-tund ko āhista-gām maiñ ne kiyā

is ek hijr ne milvā diyā visāl se bhī

ki tū gayā to mohabbat ko aam maiñ ne kiyā

mizāj-e-ġham ne bahar-taur mashġhale DhūñDe

ki dil dukhā to koī kām-vām maiñ ne kiyā

chalī jo sail-e-ravāñ par vo kāġhzī kashtī

to is safar ko mohabbat ke naam maiñ ne kiyā

vo āftāb jo dil meñ dahak rahā thā 'sa.ūd'

use sapurd-e-shafaq aaj shaam maiñ ne kiyā

hisab-e-tark-talluq tamam main ne kiya

shurua us ne kiya iKHtitam main ne kiya

mujhe bhi tark-e-mohabbat pe hairaten hain rahin

jo kaam mera nahin tha wo kaam main ne kiya

wo chahta tha ki dekhe mujhe bikharte hue

so us ka jashn ba-sad-ehtimam main ne kiya

bahut dinon mere chehre pe kirchiyan si rahin

shikast-e-zat ko aaina-fam main ne kiya

bahut dinon mein mere ghar ki KHamoshi TuTi

KHud apne-ap se ek din kalam main ne kiya

KHuda-e-zabt ne mausam pe qudtaren baKHshin

ghubar-e-tund ko aahista-gam main ne kiya

is ek hijr ne milwa diya visal se bhi

ki tu gaya to mohabbat ko aam main ne kiya

mizaj-e-gham ne bahar-taur mashghale DhunDe

ki dil dukha to koi kaam-wam main ne kiya

chali jo sail-e-rawan par wo kaghzi kashti

to is safar ko mohabbat ke nam main ne kiya

wo aaftab jo dil mein dahak raha tha 'saud'

use sapurd-e-shafaq aaj sham main ne kiya