labon se koi jab bhi kam bolta hai

laboñ se koī jab bhī kam boltā hai

to phir chashm-e-pur-nam se ġham boltā hai

hai is vāste merī āvāz meñ dard

tire hijr kā is meñ ġham boltā hai

kabhī bāteñ karte jo thaktā nahīñ thā

tire baa'd vo shaḳhs kam boltā hai

na de but-kade meñ sadā.eñ use tū

ai dil kyā koī bhī sanam boltā hai

tire naam kā vird itnā kiyā hai

jahāñ tujh ko merā dharam boltā hai

sabab hāl-e-ḳhasta kā pūchhe jo koī

tirā naam palkoñ kā nam boltā hai

'mudassir' ḳhamoshī se sahtā thā har zulm

magar dard us kā qalam boltā hai

labon se koi jab bhi kam bolta hai

to phir chashm-e-pur-nam se gham bolta hai

hai is waste meri aawaz mein dard

tere hijr ka is mein gham bolta hai

kabhi baaten karte jo thakta nahin tha

tere ba'd wo shaKHs kam bolta hai

na de but-kade mein sadaen use tu

ai dil kya koi bhi sanam bolta hai

tere nam ka wird itna kiya hai

jahan tujh ko mera dharam bolta hai

sabab haal-e-KHasta ka puchhe jo koi

tera nam palkon ka nam bolta hai

'mudassir' KHamoshi se sahta tha har zulm

magar dard us ka qalam bolta hai