tu agar KHak uDa deta hai dariyaon mein

tū agar ḳhaak uḌā detā hai dariyāoñ meñ

pyaas mujh ko bhī nahīñ lagtī hai sahrāoñ meñ

vādī-e-maut se guzrīñ to milī ham ko hayāt

kis qadar hausla rakhtā hai ḳhudā maaoñ meñ

log phir kaaT ke vo peḌ jalā dete haiñ

muddatoñ baiThte haiñ jis kī ghanī chhāoñ meñ

tum mire dil se nikal aa.e to hairat kaisī

shahr ke log to rukte bhī nahīñ gaaoñ meñ

ab kisī ġhair se shikva to munāsib bhī nahīñ

jab koī kaam nahīñ aayā shanāsāoñ meñ

muflisī kyā hai ye vo log batā.eñge tumheñ

hājateñ jin kī badal jaa.eñ tamannāoñ meñ

vaqt bigḌā to vo bīmār paḌe haiñ 'kāshif'

Dhol bajte the kabhī jin ke masīhāoñ meñ

tu agar KHak uDa deta hai dariyaon mein

pyas mujh ko bhi nahin lagti hai sahraon mein

wadi-e-maut se guzrin to mili hum ko hayat

kis qadar hausla rakhta hai KHuda maon mein

log phir kaT ke wo peD jala dete hain

muddaton baiThte hain jis ki ghani chhaon mein

tum mere dil se nikal aae to hairat kaisi

shahr ke log to rukte bhi nahin gaon mein

ab kisi ghair se shikwa to munasib bhi nahin

jab koi kaam nahin aaya shanasaon mein

muflisi kya hai ye wo log bataenge tumhein

hajaten jin ki badal jaen tamannaon mein

waqt bigDa to wo bimar paDe hain 'kashif'

Dhol bajte the kabhi jin ke masihaon mein