warid koh-e-bayaban jab mein diwana hua

vārid koh-e-bayābāñ jab meñ dīvāna huā

kohkan se dostī majnūñ se yārāna huā

vahshat-afzā kis qadar apnā bhī afsāna huā

merā qissa sunte sunte qais dīvāna huā

ḳhār-e-sahrā par ḳhirāmāñ jab maiñ dīvāna huā

ḳhūn-e-pā se rashk-e-pā.eñ baaġh vīrāna huā

aañkh nargis se laḌā kar āshnā hī andalīb

ai gul-e-tar ek maiñ aur sabza begāna huā

pahniye kafnī qanā.at hai libās faqīr meñ

kab tabdīl us ko shakl raḳht-e-shāhāna huā

kal vahāñ par hovegā gor-e-ġharībāñ kā maqām

aaj jis jā par banā qasr-e-amīrāna huā

bai.at-e-daste-subū kā pas pyālā pī liyā

taak kā shajara milā mashrab bhī rindāna huā

sham-e-kaukal dekhte hī anjuman meñ phaTak gayā

ik jale tan āshiqoñ meñ ham sā parvāna huā

Tal ga.ī sar se balā apnā muqaddar khul gayā

mū-e-sar meñ aaj dast-e-yār kā shāna huā

ab kahīñ koī Thikāna hī nahīñ juz kū-e-yār

murtad-e-ka.aba huā mardūd-e-but-ḳhāna huā

jām-e-kausar sāqī-e-kausar bhī deñge hashr meñ

dast-e-sāqī se ināyat mujh ko paimāna huā

kohr kī qutubeñ haiñ ai mah tirī tasbīh meñ

kaukab-e-sayyāra saañ raushan har ik daana huā

kaun aisā hai jo mujh bekas kī dildārī kare

darpa-e-jāñ dost dushman apnā begāna huā

ḳhuub hī pakḌe ye kāfir bhī balā kī saañp the

panja-e-afsūn-gar kā zulfoñ meñ tirī shāna huā

tum batā do kis jagah rakhe haiñ dil ushshāq ke

DhūñDh lūñgā aap merā dil hī pahchānā huā

sozan-e-īsā ne us ke paañv ke moze siye

panja-e-ḳhurshīd hāzir le ke dastāna huā

chāhtā huuñ apnī zanjīreñ junūñ ke josh meñ

rizq mere vāste zanjīr kā daana huā

dar-ba-dar maarā phirā maiñ justujū-e-yār meñ

zāhid-e-ka.aba huā rahbān-e-but-ḳhāna huā

naam par mujh bāda-kash ke saad chashm-e-mast hai

nāma-e-a.amāl merā ḳhat paimāna huā

mere ghar aayā hai mere sher sunñe ko vo 'mehr'

ġhairat-e-baitushsharaf apnā bhī kāshāna huā

warid koh-e-bayaban jab mein diwana hua

kohkan se dosti majnun se yarana hua

wahshat-afza kis qadar apna bhi afsana hua

mera qissa sunte sunte qais diwana hua

KHar-e-sahra par KHiraman jab main diwana hua

KHun-e-pa se rashk-e-paen bagh virana hua

aankh nargis se laDa kar aashna hi andalib

ai gul-e-tar ek main aur sabza begana hua

pahniye kafni qanaat hai libas faqir mein

kab tabdil us ko shakl raKHt-e-shahana hua

kal wahan par howega gor-e-ghariban ka maqam

aaj jis ja par bana qasr-e-amirana hua

baiat-e-daste-subu ka pas pyala pi liya

tak ka shajara mila mashrab bhi rindana hua

sham-e-kaukal dekhte hi anjuman mein phaTak gaya

ek jale tan aashiqon mein hum sa parwana hua

Tal gai sar se bala apna muqaddar khul gaya

mu-e-sar mein aaj dast-e-yar ka shana hua

ab kahin koi Thikana hi nahin juz ku-e-yar

murtad-e-kaba hua mardud-e-but-KHana hua

jam-e-kausar saqi-e-kausar bhi denge hashr mein

dast-e-saqi se inayat mujh ko paimana hua

kohr ki qutuben hain ai mah teri tasbih mein

kaukab-e-sayyara san raushan har ek dana hua

kaun aisa hai jo mujh bekas ki dildari kare

darpa-e-jaan dost dushman apna begana hua

KHub hi pakDe ye kafir bhi bala ki sanp the

panja-e-afsun-gar ka zulfon mein teri shana hua

tum bata do kis jagah rakhe hain dil ushshaq ke

DhunDh lunga aap mera dil hi pahchana hua

sozan-e-isa ne us ke panw ke moze siye

panja-e-KHurshid hazir le ke dastana hua

chahta hun apni zanjiren junun ke josh mein

rizq mere waste zanjir ka dana hua

dar-ba-dar mara phira main justuju-e-yar mein

zahid-e-kaba hua rahban-e-but-KHana hua

nam par mujh baada-kash ke sad chashm-e-mast hai

nama-e-amal mera KHat paimana hua

mere ghar aaya hai mere sher sunne ko wo 'mehr'

ghairat-e-baitushsharaf apna bhi kashana hua