harif-e-dastan karna paDa hai

harīf-e-dāstāñ karnā paḌā hai

zamīñ ko āsmāñ karnā paḌā hai

nikal kar aa ga.e haiñ jañgaloñ meñ

makāñ ko lā-makāñ karnā paḌā hai

savā neze pe sūraj aa gayā thā

lahū ko sā.ebāñ karnā paḌā hai

bahut tārīk thiiñ hastī kī rāheñ

badan ko kahkashāñ karnā paḌā hai

kise ma.alūm lams un uñgliyoñ kā

havā ko rāz-dāñ karnā paḌā hai

vo shāyad koī sachchī baat kah de

use phir bad-gumāñ karnā paḌā hai

maiñ apne saare patte faash kartā

magar aisā kahāñ karnā paḌā hai

safar āsāñ nahīñ haraf o qalam kā

hameñ tai haft-ḳhvāñ karnā paḌā hai

thā jis se iḳhtilāf-e-rā.e mumkin

usī ko mehrbāñ karnā paḌā hai

saf-e-a.adā meñ apne bāzuoñ ko

mujhe 'aḳhtar' kamāñ karnā paḌā hai

harif-e-dastan karna paDa hai

zamin ko aasman karna paDa hai

nikal kar aa gae hain jangalon mein

makan ko la-makan karna paDa hai

sawa neze pe suraj aa gaya tha

lahu ko saeban karna paDa hai

bahut tarik thin hasti ki rahen

badan ko kahkashan karna paDa hai

kise malum lams un ungliyon ka

hawa ko raaz-dan karna paDa hai

wo shayad koi sachchi baat kah de

use phir bad-guman karna paDa hai

main apne sare patte fash karta

magar aisa kahan karna paDa hai

safar aasan nahin haraf o qalam ka

hamein tai haft-KHwan karna paDa hai

tha jis se iKHtilaf-e-rae mumkin

usi ko mehrban karna paDa hai

saf-e-ada mein apne bazuon ko

mujhe 'aKHtar' kaman karna paDa hai