har sang mein sharar hai tere zuhur ka

har sañg meñ sharār hai tere zuhūr kā

muusā nahīñ ki sair karūñ koh-e-tūr kā

paḌhiye durūd husn-e-sabīh-o-malīh par

jalva har ek par hai mohammad ke nuur kā

toḌūñ ye aa.ina ki ham-āġhosh-e-aks hai

hove na muj ko paas jo tere huzūr kā

bekas koī mare to jale us pe dil mirā

goyā hai ye charāġh ġharībāñ kī gor kā

ham to qafas meñ aan ke ḳhāmosh ho rahe

ai ham-safīr fā.eda nāhaq ke shor kā

saaqī se kah ki hai shab-e-mahtāb jalva-gar

de basma-posh ho ke tū sāġhar bilor kā

'saudā' kabhī na māniyo vaa.iz kī guftugū

āvāz-e-duhul hai ḳhush-ā.ind duur kā

har sang mein sharar hai tere zuhur ka

musa nahin ki sair karun koh-e-tur ka

paDhiye durud husn-e-sabih-o-malih par

jalwa har ek par hai mohammad ke nur ka

toDun ye aaina ki ham-aghosh-e-aks hai

howe na muj ko pas jo tere huzur ka

bekas koi mare to jale us pe dil mera

goya hai ye charagh ghariban ki gor ka

hum to qafas mein aan ke KHamosh ho rahe

ai ham-safir faeda nahaq ke shor ka

saqi se kah ki hai shab-e-mahtab jalwa-gar

de basma-posh ho ke tu saghar bilor ka

'sauda' kabhi na maniyo waiz ki guftugu

aawaz-e-duhul hai KHush-aind dur ka