har naghma-e-pur-dard har ek saz se pahle

har naġhma-e-pur-dard har ik saaz se pahle

hañgāma bapā hotā hai āġhāz se pahle

dil dard-e-mohabbat se to vāqif bhī nahīñ thā

jānāñ tire baḳhshe hue e.azāz se pahle

sho.aloñ pe chalātī hai mohabbat dil-e-nādāñ

anjām zarā soch le āġhāz se pahle

ab merī tabāhī kā use ġham bhī nahīñ hai

jis ne mujhe chāhā thā baḌe naaz se pahle

shāhīn vo kahlāne kā haqdār nahīñ hai

jo sū-e-falak dekhe na parvāz se pahle

ab raaz kī bāteñ na batā de vo kisī se

ye ḳhauf nahīñ thā kabhī hamrāz se pahle

thī mīr-taqī-'mīr' kī nauhagarī mash.hūr

'afzal' kī sisaktī huī āvāz se pahle

har naghma-e-pur-dard har ek saz se pahle

hangama bapa hota hai aaghaz se pahle

dil dard-e-mohabbat se to waqif bhi nahin tha

jaanan tere baKHshe hue eazaz se pahle

shoalon pe chalati hai mohabbat dil-e-nadan

anjam zara soch le aaghaz se pahle

ab meri tabahi ka use gham bhi nahin hai

jis ne mujhe chaha tha baDe naz se pahle

shahin wo kahlane ka haqdar nahin hai

jo su-e-falak dekhe na parwaz se pahle

ab raaz ki baaten na bata de wo kisi se

ye KHauf nahin tha kabhi hamraaz se pahle

thi mir-taqi-'mir' ki nauhagari mashhur

'afzal' ki sisakti hui aawaz se pahle