har nafas mein dil ki betabi baDhate jaiye

har nafas meñ dil kī betābī baḌhāte jā.iye

duur rah kar bhī mire nazdīk aate jā.iye

ik zarā tham tham ke ye parde uThāte jā.iye

dekhne vāloñ kī nazreñ āzmāte jā.iye

mere is zulmat-kade ko jagmagāte jā.iye

ho sake to merī ḳhātir muskurāte jā.iye

phir isī andāz se nazreñ milāte jā.iye

dekhne vāloñ kī nazreñ āzmāte jā.iye

yā koī taskīn kī sūrat batāte jā.iye

yā phir apnī yaad se ġhāfil banāte jā.iye

rafta rafta ḳhud ko dīvāna banāte jā.iye

husn kī dilchaspiyoñ ke kaam aate jā.iye

aql kahtī hai dobāra āzmānā jahl hai

dil ye kahtā hai fareb-e-dost khāte jā.iye

kufr o īmāñ ke sivā bhī kuchh manāzir aur haiñ

un ke har andāz par īmān laate jā.iye

aa hī jā.egā koī qismat kā maarā qais bhī

har taraf umm-e-ruḳh-e-lailā bichhāte jā.iye

maiñ ne kuchh fitrat hī paa.ī hai ajab mushkil-pasand

merī har mushkil ko mushkil-tar banāte jā.iye

yaad hai 'māhir' mujhe un kā vo kahnā yaad hai

aaj to bas raat bhar ġhazleñ sunāte jā.iye

har nafas mein dil ki betabi baDhate jaiye

dur rah kar bhi mere nazdik aate jaiye

ek zara tham tham ke ye parde uThate jaiye

dekhne walon ki nazren aazmate jaiye

mere is zulmat-kade ko jagmagate jaiye

ho sake to meri KHatir muskuraate jaiye

phir isi andaz se nazren milate jaiye

dekhne walon ki nazren aazmate jaiye

ya koi taskin ki surat batate jaiye

ya phir apni yaad se ghafil banate jaiye

rafta rafta KHud ko diwana banate jaiye

husn ki dilchaspiyon ke kaam aate jaiye

aql kahti hai dobara aazmana jahl hai

dil ye kahta hai fareb-e-dost khate jaiye

kufr o iman ke siwa bhi kuchh manazir aur hain

un ke har andaz par iman late jaiye

aa hi jaega koi qismat ka mara qais bhi

har taraf umm-e-ruKH-e-laila bichhate jaiye

main ne kuchh fitrat hi pai hai ajab mushkil-pasand

meri har mushkil ko mushkil-tar banate jaiye

yaad hai 'mahir' mujhe un ka wo kahna yaad hai

aaj to bas raat bhar ghazlen sunate jaiye