hairaton ke silsile soz-e-nihan tak aa gae

hairatoñ ke silsile soz-e-nihāñ tak aa ga.e

ham nazar tak chāhte the tum to jaañ tak aa ga.e

nā-murādī apnī qismat gumrahī apnā nasīb

kārvāñ kī ḳhair ho ham kārvāñ tak aa ga.e

un kī palkoñ par sitāre apne hoñToñ pe hañsī

qissa-e-ġham kahte kahte ham kahāñ tak aa ga.e

zulf meñ ḳhushbū na thī yā rañg aariz meñ na thā

aap kis kī aarzū meñ gulsitāñ tak aa ga.e

rafta rafta rañg laayā jazba-e-ḳhāmosh-e-ishq

vo taġhāful karte karte imtihāñ tak aa ga.e

ḳhud tumheñ chāk-e-garebāñ kā shu.ūr aa jā.egā

tum vahāñ tak aa to jaao ham jahāñ tak aa ga.e

aaj 'qābil' mai-kade meñ inqalāb aane ko hai

ahl-e-dil andesha-e-sūd-o-ziyāñ tak aa ga.e

hairaton ke silsile soz-e-nihan tak aa gae

hum nazar tak chahte the tum to jaan tak aa gae

na-muradi apni qismat gumrahi apna nasib

karwan ki KHair ho hum karwan tak aa gae

un ki palkon par sitare apne honTon pe hansi

qissa-e-gham kahte kahte hum kahan tak aa gae

zulf mein KHushbu na thi ya rang aariz mein na tha

aap kis ki aarzu mein gulsitan tak aa gae

rafta rafta rang laya jazba-e-KHamosh-e-ishq

wo taghaful karte karte imtihan tak aa gae

KHud tumhein chaak-e-gareban ka shuur aa jaega

tum wahan tak aa to jao hum jahan tak aa gae

aaj 'qabil' mai-kade mein inqalab aane ko hai

ahl-e-dil andesha-e-sud-o-ziyan tak aa gae