hafiz wasl mein kuchh hijr ka KHayal na tha

'hafīz' vasl meñ kuchh hijr kā ḳhayāl na thā

vafūr-e-aish meñ andesha-e-ma.āl na thā

burā hī kyā hai baratnā purānī rasmoñ kā

kabhī sharāb kā piinā bhī kyā halāl na thā

nayā hai ab ke baras kuchh bahār kā aalam

junūñ kā zor to aisā guzishta-sāl na thā

ḳhayāl tum ne dilāyā jo guzrī bātoñ kā

malāl ab vo huā pahle jo malāl na thā

vo din haiñ yaad ki barsoñ thī ḳhud-farāmoshī

ye dhun kisī kī thī apnā bhī kuchh ḳhayāl na thā

tum aa ga.e ki mirī jaan bach ga.ī varna

kuchh aaj maut ke aane meñ ehtimāl na thā

koī to vaj.h-e-masarrat hai go kaheñ na kaheñ

ki yuuñ 'hafīz' kā chehra kabhī bahāl na thā

'hafiz' wasl mein kuchh hijr ka KHayal na tha

wafur-e-aish mein andesha-e-maal na tha

bura hi kya hai baratna purani rasmon ka

kabhi sharab ka pina bhi kya halal na tha

naya hai ab ke baras kuchh bahaar ka aalam

junun ka zor to aisa guzishta-sal na tha

KHayal tum ne dilaya jo guzri baaton ka

malal ab wo hua pahle jo malal na tha

wo din hain yaad ki barson thi KHud-faramoshi

ye dhun kisi ki thi apna bhi kuchh KHayal na tha

tum aa gae ki meri jaan bach gai warna

kuchh aaj maut ke aane mein ehtimal na tha

koi to wajh-e-masarrat hai go kahen na kahen

ki yun 'hafiz' ka chehra kabhi bahaal na tha