guman yahi hai ki dil KHud udhar ko jata hai

gumāñ yahī hai ki dil ḳhud udhar ko jaatā hai

so shak kā fā.eda us kī nazar ko jaatā hai

hadeñ vafā kī bhī āḳhir havas se miltī haiñ

ye rāsta bhī idhar se udhar ko jaatā hai

ye dil kā dard to umroñ kā rog hai pyāre

so jaa.e bhī to pahar do pahar ko jaatā hai

ye haal hai ki ka.ī rāste haiñ pesh-e-nazar

magar ḳhayāl tirī rah-guzar ko jaatā hai

tū 'anvarī' hai na 'ġhālib' to phir ye kyuuñ hai 'farāz'

har ek sail-e-balā tere ghar ko jaatā hai

guman yahi hai ki dil KHud udhar ko jata hai

so shak ka faeda us ki nazar ko jata hai

haden wafa ki bhi aaKHir hawas se milti hain

ye rasta bhi idhar se udhar ko jata hai

ye dil ka dard to umron ka rog hai pyare

so jae bhi to pahar do pahar ko jata hai

ye haal hai ki kai raste hain pesh-e-nazar

magar KHayal teri rah-guzar ko jata hai

tu 'anwari' hai na 'ghaalib' to phir ye kyun hai 'faraaz'

har ek sail-e-bala tere ghar ko jata hai