wo gham mila jo ayan bhi nahin nihan bhi nahin

vo ġham milā jo 'ayāñ bhī nahīñ nihāñ bhī nahīñ

mire liye to sukūñ bhī nahīñ fuġhāñ bhī nahīñ

vo barg-e-zard nahīñ hai shajar kī ġhairat hai

bichhaḌ ke shāḳh se jo shākī-e-ḳhizāñ bhī nahīñ

mirī hikāyat-e-ġham sun ke yaar kyā leñge

shunīdanī bhī nahīñ qābil-e-bayāñ bhī nahīñ

tulū’-e-mehr kā sadiyoñ se intizār sahī

shikast-e-shab kā abhī to koī nishāñ bhī nahīñ

fazā-e-dair-o-haram to udaas thī so rahī

hujūm-e-shauq sar-e-ku-e-mah-vashāñ bhī nahīñ

ġhubār-e-rāh meñ 'aslam' unheñ talāsh na kar

nasīb-e-ahl-e-vafā gard-e-kārvāñ bhī nahīñ

wo gham mila jo 'ayan bhi nahin nihan bhi nahin

mere liye to sukun bhi nahin fughan bhi nahin

wo barg-e-zard nahin hai shajar ki ghairat hai

bichhaD ke shaKH se jo shaki-e-KHizan bhi nahin

meri hikayat-e-gham sun ke yar kya lenge

shunidani bhi nahin qabil-e-bayan bhi nahin

tulu’-e-mehr ka sadiyon se intizar sahi

shikast-e-shab ka abhi to koi nishan bhi nahin

faza-e-dair-o-haram to udas thi so rahi

hujum-e-shauq sar-e-ku-e-mah-washan bhi nahin

ghubar-e-rah mein 'aslam' unhen talash na kar

nasib-e-ahl-e-wafa gard-e-karwan bhi nahin