nikaliye nae zulm-o-sitam ki gunjaish

nikāliye na.e zulm-o-sitam kī gunjā.ish

abhī hai aur mire dil meñ ġham kī gunjā.ish

vafā kī raah kabhī ḳhatm hī nahīñ hotī

har ik qadam pe hai aur ik qadam kī gunjā.ish

hazāroñ saal se aañsū bahā.ī jaatī hai

magar na ḳhatm huī chashm-e-nam kī gunjā.ish

hañsī ke saath hī āñkhoñ meñ aa gaye aañsū

chhupī huī thī ḳhushī meñ bhī ġham kī gunjā.ish

rahe ḳhayāl muqaddar sañvārne vaale

na rahne paa.e kisī pech-o-ḳham kī gunjā.ish

hamārī saañs baḌe dukh ke saath TuuT ga.ī

zarā bhī jab na rahī zer-o-bam kī gunjā.ish

hujūm-e-jalva-e-asnām hai nazar meñ 'adīl'

magar hai dil meñ faqat ik sanam kī gunjā.ish

nikaliye nae zulm-o-sitam ki gunjaish

abhi hai aur mere dil mein gham ki gunjaish

wafa ki rah kabhi KHatm hi nahin hoti

har ek qadam pe hai aur ek qadam ki gunjaish

hazaron sal se aansu bahai jati hai

magar na KHatm hui chashm-e-nam ki gunjaish

hansi ke sath hi aankhon mein aa gaye aansu

chhupi hui thi KHushi mein bhi gham ki gunjaish

rahe KHayal muqaddar sanwarne wale

na rahne pae kisi pech-o-KHam ki gunjaish

hamari sans baDe dukh ke sath TuT gai

zara bhi jab na rahi zer-o-bam ki gunjaish

hujum-e-jalwa-e-asnam hai nazar mein 'adil'

magar hai dil mein faqat ek sanam ki gunjaish