kash is sadma-e-paiham ka janaza uTThe

kaash is sadma-e-paiham kā janāza uTThe

aisā kuchh ho ki mire ġham kā janāza uTThe

ashk barsāo manāo use tā-ki us se

ātish-e-hijr ke mausam kā janāza uTThe

ālam-e-ġham meñ bhī 'ālam kī paḌī hai mujh ko

chāhtā huuñ ġham-e-‘ālam kā janāza uTThe

us kī ḳhvāhish hai na.e rishte ko ab dafn kareñ

ya.anī maiñ tum hī raheñ ham kā janāza uTThe

aap misra' to uThā.eñ bahut ūñchā lekin

aise mat gaa.eñ ki sargam kā janāza uTThe

fikr mayyit kī tumheñ hai to du'ā ye bhī karo

jism se pahle mire dam kā janāza uTThe

sirf almārī se ghar kī nahīñ chaltā 'gauhar'

dil se bhī yādoñ ke album kā janāza uTThe

kash is sadma-e-paiham ka janaza uTThe

aisa kuchh ho ki mere gham ka janaza uTThe

ashk barsao manao use ta-ki us se

aatish-e-hijr ke mausam ka janaza uTThe

aalam-e-gham mein bhi 'alam ki paDi hai mujh ko

chahta hun gham-e-‘alam ka janaza uTThe

us ki KHwahish hai nae rishte ko ab dafn karen

yani main tum hi rahen hum ka janaza uTThe

aap misra' to uThaen bahut uncha lekin

aise mat gaen ki sargam ka janaza uTThe

fikr mayyit ki tumhein hai to du'a ye bhi karo

jism se pahle mere dam ka janaza uTThe

sirf almari se ghar ki nahin chalta 'gauhar'

dil se bhi yaadon ke album ka janaza uTThe