dil kabhi mail-e-fughan na hua

dil kabhī mā.il-e-fuġhāñ na huā

qissa-e-ġham jo thā bayāñ na huā

ġhair kī baat kyā karūñ hamdam

mujh se apnā hī ġham bayāñ na huā

aage kyā hogā ye kise mā'lūm

vaqt ab tak to mehrbāñ na huā

biich se baat kaaT dī us ne

qissa-e-dard-o-ġham bayāñ na huā

zindagī kā 'urūj kyā jaane

vo jo taqdīr-e-āsmāñ na huā

ik ḳhamoshī hai laakh goyā.ī

tum jo samjho to kyā bayāñ na huā

tab' tūfāñ-navāz hai apnī

maiñ kināroñ kā pāsbāñ na huā

apnī bāteñ haiñ sub.h-o-shām 'azīz'

maiñ zamāne kā tarjumāñ na huā

dil kabhi mail-e-fughan na hua

qissa-e-gham jo tha bayan na hua

ghair ki baat kya karun hamdam

mujh se apna hi gham bayan na hua

aage kya hoga ye kise ma'lum

waqt ab tak to mehrban na hua

bich se baat kaT di us ne

qissa-e-dard-o-gham bayan na hua

zindagi ka 'uruj kya jaane

wo jo taqdir-e-asman na hua

ek KHamoshi hai lakh goyai

tum jo samjho to kya bayan na hua

tab' tufan-nawaz hai apni

main kinaron ka pasban na hua

apni baaten hain subh-o-sham 'aziz'

main zamane ka tarjuman na hua