gham mujhe hasrat mujhe wahshat mujhe sauda mujhe

ġham mujhe hasrat mujhe vahshat mujhe saudā mujhe

ek dil de kar ḳhudā ne de diyā kyā kyā mujhe

hai husūl-e-ārzū kā raaz tark-e-ārzū

maiñ ne duniyā chhoḌ dī to mil ga.ī duniyā mujhe

ye namāz-e-ishq hai kaisā adab kis kā adab

apne pā-e-nāz par karne bhī de sajda mujhe

kah ke soyā huuñ ye apne iztirāb-e-shauq se

jab vo aa.eñ qabr par fauran jagā denā mujhe

sub.h tak kyā kyā tirī ummīd ne ta.ane diye

aa gayā thā shām-e-ġham ik niiñd kā jhokā mujhe

dekhte hī dekhte duniyā se maiñ uTh jā.ūñgā

dekhtī kī dekhtī rah jā.egī duniyā mujhe

jalva-gar hai is meñ ai 'sīmāb' ik duniyā-e-husn

jām-e-jam se hai ziyāda dil kā ā.īna mujhe

gham mujhe hasrat mujhe wahshat mujhe sauda mujhe

ek dil de kar KHuda ne de diya kya kya mujhe

hai husul-e-arzu ka raaz tark-e-arzu

main ne duniya chhoD di to mil gai duniya mujhe

ye namaz-e-ishq hai kaisa adab kis ka adab

apne pa-e-naz par karne bhi de sajda mujhe

kah ke soya hun ye apne iztirab-e-shauq se

jab wo aaen qabr par fauran jaga dena mujhe

subh tak kya kya teri ummid ne tane diye

aa gaya tha sham-e-gham ek nind ka jhoka mujhe

dekhte hi dekhte duniya se main uTh jaunga

dekhti ki dekhti rah jaegi duniya mujhe

jalwa-gar hai is mein ai 'simab' ek duniya-e-husn

jam-e-jam se hai ziyaada dil ka aaina mujhe