ghairon pe khul na jae kahin raaz dekhna

ġhairoñ pe khul na jaa.e kahīñ raaz dekhnā

merī taraf bhī ġhamza-e-ġhammāz dekhnā

uḌte hī rañg-e-ruḳh mirā nazroñ se thā nihāñ

is murġh-e-par-shikasta kī parvāz dekhnā

dushnām-e-yār tab-e-hazīñ par girāñ nahīñ

ai ham-nafas nazākat-e-āvāz dekhnā

dekh apnā hāl-e-zār munajjim huā raqīb

thā sāzgār tāla-e-nā-sāz dekhnā

bad-kām kā ma.aal burā hai jazā ke din

hāl-e-sip.har-e-tafraqa-andāz dekhnā

mat rakhiyo gard-e-tārik-e-ushshāq par qadam

pāmāl ho na jaa.e sar-afrāz dekhnā

merī nigāh-e-ḳhīra dikhāte haiñ ġhair ko

be-tāqatī pe sarzanish-e-nāz dekhnā

tark-e-sanam bhī kam nahīñ soz-e-jahīm se

'momin' ġham-e-ma.āl kā āġhāz dekhnā

ghairon pe khul na jae kahin raaz dekhna

meri taraf bhi ghamza-e-ghammaz dekhna

uDte hi rang-e-ruKH mera nazron se tha nihan

is murgh-e-par-shikasta ki parwaz dekhna

dushnam-e-yar tab-e-hazin par giran nahin

ai ham-nafas nazakat-e-awaz dekhna

dekh apna haal-e-zar munajjim hua raqib

tha sazgar tala-e-na-saz dekhna

bad-kaam ka maal bura hai jaza ke din

haal-e-siphar-e-tafraqa-andaz dekhna

mat rakhiyo gard-e-tarik-e-ushshaq par qadam

pamal ho na jae sar-afraaz dekhna

meri nigah-e-KHira dikhate hain ghair ko

be-taqati pe sarzanish-e-naz dekhna

tark-e-sanam bhi kam nahin soz-e-jahim se

'momin' gham-e-maal ka aaghaz dekhna