gae dinon ke daraKHshanda rabton se na ruTh

ga.e dinoñ ke daraḳhshanda rābtoñ se na ruuTh

mire ḳhulūs ke tābinda silsiloñ se na ruuTh

mohabbatoñ kī vafā-kesh bārishoñ se na ruuTh

kisī se ruuTh magar apne dostoñ se na ruuTh

ḳhizāñ kī zard havā.eñ tirī talāsh meñ haiñ

chaman se ruuTh daraḳhtoñ kī Tahniyoñ se na ruuTh

palaT na jaa.eñ hamesha ko tere āñgan se

gudāz lamhoñ kī be-ḳhvāb āhaToñ se na ruuTh

aziiz jaan khulī khiḌkiyoñ kī ḳhushbū ko

galī se tark-e-marāsim sahī gharoñ se na ruuTh

gumān-o-vaham ke be-nām jhuTpuToñ se nikal

zabāñ na khol magar dil kī dhaḌkanoñ se na ruuTh

javāñ rutoñ ko gale se lagā ke jī 'irfān'

dil-o-nazar ke ziyā-bār mausamoñ se na ruuTh

gae dinon ke daraKHshanda rabton se na ruTh

mere KHulus ke tabinda silsilon se na ruTh

mohabbaton ki wafa-kesh barishon se na ruTh

kisi se ruTh magar apne doston se na ruTh

KHizan ki zard hawaen teri talash mein hain

chaman se ruTh daraKHton ki Tahniyon se na ruTh

palaT na jaen hamesha ko tere aangan se

gudaz lamhon ki be-KHwab aahaTon se na ruTh

aziz jaan khuli khiDkiyon ki KHushbu ko

gali se tark-e-marasim sahi gharon se na ruTh

guman-o-waham ke be-nam jhuTpuTon se nikal

zaban na khol magar dil ki dhaDkanon se na ruTh

jawan ruton ko gale se laga ke ji 'irfan'

dil-o-nazar ke ziya-bar mausamon se na ruTh