fasl-e-bahaar aai hai paimana chahiye

fasl-e-bahār aa.ī hai paimāna chāhiye

bulbul ke saath nāra-e-mastāna chāhiye

ushshāq-e-sham.a-e-husn ko kyā kyā na chāhiye

parvāz-e-rañg ko par-e-parvāna chāhiye

piirī meñ raat din hameñ paimāna chāhiye

rāsha ke badle laġhzish-e-mastāna chāhiye

vahshat meñ baat aql kī sunñā na chāhiye

kānoñ meñ pamba-e-kaf-e-dīvāna chāhiye

kañghī banā.ūñ chob-e-asā-e-kalīm kī

tasḳhīr mār-e-gesū-e-jānāna chāhiye

dariyā-e-vahdat-o-chaman-e-dahr se hameñ

durr-e-yagāna sabza-e-begāna chāhiye

āb-o-ġhizā-e-āshiq-e-dandāñ muhāl hai

roz āb-o-dāna-e-dur-e-yakdāna chāhiye

maiñ sā.il-e-kamāl-e-junūñ huuñ mire liye

kajkol kāsa-e-sar-e-dīvāna chāhiye

asrār-e-haq haiñ dil meñ magar dil hai be-ḳhabar

is ganj ke liye yahī vīrāna chāhiye

sair-e-bahisht chāhte haiñ nashshe meñ mudām

mastoñ ko chashm-e-hūr kā paimāna chāhiye

go be-naqāb rahte ho parde meñ hai hijāb

dar-parda ham se aap ko chhupnā na chāhiye

āshiq banā ke ham ko jalāte haiñ sham.a-rū

parvāna chāhiye unheñ parvāna chāhiye

ai pīr-e-mai-farosh dar-e-tauba kī tarah

vā roz-e-hashr tak dar-e-mai-ḳhāna chāhiye

tā-marg āshnā na huā ek sabza rañg

turbat par apnī sabza-e-begāna chāhiye

dushman hai vo to tum bhī na ho dost ai 'munīr'

apnā burā na chāhiye achchhā na chāhiye

fasl-e-bahaar aai hai paimana chahiye

bulbul ke sath nara-e-mastana chahiye

ushshaq-e-shama-e-husn ko kya kya na chahiye

parwaz-e-rang ko par-e-parwana chahiye

piri mein raat din hamein paimana chahiye

rasha ke badle laghzish-e-mastana chahiye

wahshat mein baat aql ki sunna na chahiye

kanon mein pamba-e-kaf-e-diwana chahiye

kanghi banaun chob-e-asa-e-kalim ki

tasKHir mar-e-gesu-e-jaanana chahiye

dariya-e-wahdat-o-chaman-e-dahr se hamein

durr-e-yagana sabza-e-begana chahiye

aab-o-ghiza-e-ashiq-e-dandan muhaal hai

roz aab-o-dana-e-dur-e-yakdana chahiye

main sail-e-kamal-e-junun hun mere liye

kajkol kasa-e-sar-e-diwana chahiye

asrar-e-haq hain dil mein magar dil hai be-KHabar

is ganj ke liye yahi virana chahiye

sair-e-bahisht chahte hain nashshe mein mudam

maston ko chashm-e-hur ka paimana chahiye

go be-naqab rahte ho parde mein hai hijab

dar-parda hum se aap ko chhupna na chahiye

aashiq bana ke hum ko jalate hain shama-ru

parwana chahiye unhen parwana chahiye

ai pir-e-mai-farosh dar-e-tauba ki tarah

wa roz-e-hashr tak dar-e-mai-KHana chahiye

ta-marg aashna na hua ek sabza rang

turbat par apni sabza-e-begana chahiye

dushman hai wo to tum bhi na ho dost ai 'munir'

apna bura na chahiye achchha na chahiye