tumhaare sath bhi dil ko KHala sa lagta hai

tumhāre saath bhī dil ko ḳhalā sā lagtā hai

ye kaisā rabt hai jo fāsla sā lagtā hai

vo hañs ke baat kare to yaqīn aatā nahīñ

udaas ho to mujhe āshnā sā lagtā hai

tumhārī yaad meñ ham Thiik se nahīñ sote

hameñ to jāgnā ik mas.ala sā lagtā hai

vo merī soch mirā ḳhvāb merī duniyā hai

ho rū-barū jo mire mo'jiza sā lagtā hai

us aa.ine kī agar ġhairiyat ko dekho to

mirā hī 'aks mujhe dūsrā sā lagtā hai

kisī ke hijr ne badlā hai is qadar mujh ko

har ek shaḳhs mujhe bāvlā sā lagtā hai

vo apnī zaat meñ gum hai to gum rahe lekin

vo be-ruḳhī meñ bhī kuchh āshnā sā lagtā hai

vo mere dil meñ bhī hai merī dastaras meñ bhī

magar sukūn nahīñ mas.ala sā lagtā hai

tumhaare sath bhi dil ko KHala sa lagta hai

ye kaisa rabt hai jo fasla sa lagta hai

wo hans ke baat kare to yaqin aata nahin

udas ho to mujhe aashna sa lagta hai

tumhaari yaad mein hum Thik se nahin sote

hamein to jagna ek masala sa lagta hai

wo meri soch mera KHwab meri duniya hai

ho ru-baru jo mere mo'jiza sa lagta hai

us aaine ki agar ghairiyat ko dekho to

mera hi 'aks mujhe dusra sa lagta hai

kisi ke hijr ne badla hai is qadar mujh ko

har ek shaKHs mujhe bawla sa lagta hai

wo apni zat mein gum hai to gum rahe lekin

wo be-ruKHi mein bhi kuchh aashna sa lagta hai

wo mere dil mein bhi hai meri dastaras mein bhi

magar sukun nahin masala sa lagta hai