ek ne.amat tire mahjūr ke haath aa.ī hai
iid kā chāñd charāġh-e-shab-e-tanhā.ī hai
qaid meñ bas ye koī kah de bahār aa.ī hai
phir to maiñ huuñ mirī zanjīr hai añgḌā.ī hai
kitnā dilchasp hai allāh mirā qissa-e-ġham
aaj koī nahīñ kahtā mujhe niiñd aa.ī hai
zahr aur zahr kī tāsīr batāne vaale
ab samajh le ki na saudā hai na saudā.ī hai
sub.h tak hogā mire ghar pe hujūm-e-ḳhilqat
raat kī raat faqat ālam-e-tanhā.ī hai
dāman-o-jeb-o-garebāñ bhī nisār-e-vahshat
ab kisī baat meñ zillat hai na rusvā.ī hai
do ghaḌī dil ke bahalne kā sahārā bhī gayā
lījiye aaj tasavvur meñ bhī tanhā.ī hai
muddateñ guzrīñ hameñ ashk bahāte 'manzar'
aaj ḳhud us ne hañsāyā to hañsī aa.ī hai
ek neamat tere mahjur ke hath aai hai
id ka chand charagh-e-shab-e-tanhai hai
qaid mein bas ye koi kah de bahaar aai hai
phir to main hun meri zanjir hai angDai hai
kitna dilchasp hai allah mera qissa-e-gham
aaj koi nahin kahta mujhe nind aai hai
zahr aur zahr ki tasir batane wale
ab samajh le ki na sauda hai na saudai hai
subh tak hoga mere ghar pe hujum-e-KHilqat
raat ki raat faqat aalam-e-tanhai hai
daman-o-jeb-o-gareban bhi nisar-e-wahshat
ab kisi baat mein zillat hai na ruswai hai
do ghaDi dil ke bahalne ka sahaara bhi gaya
lijiye aaj tasawwur mein bhi tanhai hai
muddaten guzrin hamein ashk bahate 'manzar'
aaj KHud us ne hansaya to hansi aai hai
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.