ek-adh harif-e-gham-e-duniya bhi nahin tha

ek-ādh harīf-e-ġham-e-duniyā bhī nahīñ thā

arbāb-e-vafā meñ koī itnā bhī nahīñ thā

lab jalte haiñ mai-ḳhvāroñ ke siine nahīñ jalte

is darja ḳhunuk sho.ala-e-mīnā bhī nahīñ thā

ik us kā taġhāful hai vo yaad aa hī gayā hai

ik vāda-e-fardā hai vo bhūlā bhī nahīñ thā

kah sakte to ahvāl-e-jahāñ tum se hī kahte

tum se to kisī baat kā pardā bhī nahīñ thā

ab husn pe ḳhud us kā tasavvur bhī girāñ hai

pahle to girāñ ḳhvāb-e-zuleḳhā bhī nahīñ thā

pahle mirī vahshat ke ye andāz bhī kam the

pahle mujhe andāza-e-sahrā bhī nahīñ thā

ab ye hai ki thamtā huā dariyā hai tirī yaad

be-faiz ye dariyā kabhī aisā bhī nahīñ thā

achchhā to muravvat hī tirā bosa-e-lab hai

achchhā ye koī dil kā taqāzā bhī nahīñ thā

majnūñ ke sivā kis se uThī minnat-e-dīdār

āḳhir ruḳh-e-lailā thā tamāshā bhī nahīñ thā

ek-adh harif-e-gham-e-duniya bhi nahin tha

arbab-e-wafa mein koi itna bhi nahin tha

lab jalte hain mai-KHwaron ke sine nahin jalte

is darja KHunuk shoala-e-mina bhi nahin tha

ek us ka taghaful hai wo yaad aa hi gaya hai

ek wada-e-farda hai wo bhula bhi nahin tha

kah sakte to ahwal-e-jahan tum se hi kahte

tum se to kisi baat ka parda bhi nahin tha

ab husn pe KHud us ka tasawwur bhi giran hai

pahle to giran KHwab-e-zuleKHa bhi nahin tha

pahle meri wahshat ke ye andaz bhi kam the

pahle mujhe andaza-e-sahra bhi nahin tha

ab ye hai ki thamta hua dariya hai teri yaad

be-faiz ye dariya kabhi aisa bhi nahin tha

achchha to murawwat hi tera bosa-e-lab hai

achchha ye koi dil ka taqaza bhi nahin tha

majnun ke siwa kis se uThi minnat-e-didar

aaKHir ruKH-e-laila tha tamasha bhi nahin tha