ye kya tilism hai duniya pe bar guzri hai

ye kyā tilism hai duniyā pe baar guzrī hai

vo zindagī jo sar-e-rahguzār guzrī hai

guloñ kī gum-shudagī se surāġh miltā hai

kahīñ chaman se nasīm-e-bahār guzrī hai

kahīñ sahar kā ujālā huā hai ham-nafaso

ki mauj-e-barq sar-e-shāḳh-sār guzrī hai

rahā hai ye sar-e-shorīda misl-e-shola buland

agarche mujh pe qayāmat hazār guzrī hai

ye hādisa bhī huā hai ki ishq-e-yār kī yaad

dayār-e-qalb se begāna-vār guzrī hai

unhīñ ko arz-e-vafā kā thā ishtiyāq bahut

unhīñ ko arz-e-vafā nā-gavār guzrī hai

harīm-e-shauq mahaktā hai aaj tak 'ābid'

yahāñ se nik.hat-e-gesu-e-yār guzrī hai

ye kya tilism hai duniya pe bar guzri hai

wo zindagi jo sar-e-rahguzar guzri hai

gulon ki gum-shudagi se suragh milta hai

kahin chaman se nasim-e-bahaar guzri hai

kahin sahar ka ujala hua hai ham-nafaso

ki mauj-e-barq sar-e-shaKH-sar guzri hai

raha hai ye sar-e-shorida misl-e-shola buland

agarche mujh pe qayamat hazar guzri hai

ye hadisa bhi hua hai ki ishq-e-yar ki yaad

dayar-e-qalb se begana-war guzri hai

unhin ko arz-e-wafa ka tha ishtiyaq bahut

unhin ko arz-e-wafa na-gawar guzri hai

harim-e-shauq mahakta hai aaj tak 'abid'

yahan se nikhat-e-gesu-e-yar guzri hai