nasib-e-KHasta ki meraj-o-id chahta hun

nasīb-e-ḳhasta kī me'rāj-o-'īd chāhtā huuñ

maiñ apne chāñd kī ik baar diid chāhtā huuñ

tamām zaḳhm-e-dil ab ho ga.e purāne se

ai mehrbāñ koī ghaav jadīd chāhtā huuñ

marīz-e-'ishq ko jo kheñch laa.e marghaT se

mire ḳhudā koī aisī umiid chāhtā huuñ

use sunā.ūñ ki vo zulm phir kabhī na kare

sitam pe shaiḳh jī aisī va'ī.d chāhtā huuñ

hai ik nigāh kā terī mujhe to ab bhī ḳhumār

tirā karam koī aisā mazīd chāhtā huuñ

bahut satāyā hai maḳhlūq ne tirī yā-rab

sukūn ab pa.e-hazrat-farīd chāhtā huuñ

nasib-e-KHasta ki me'raj-o-'id chahta hun

main apne chand ki ek bar did chahta hun

tamam zaKHm-e-dil ab ho gae purane se

ai mehrban koi ghaw jadid chahta hun

mariz-e-'ishq ko jo khench lae marghaT se

mere KHuda koi aisi umid chahta hun

use sunaun ki wo zulm phir kabhi na kare

sitam pe shaiKH ji aisi wa'id chahta hun

hai ek nigah ka teri mujhe to ab bhi KHumar

tera karam koi aisa mazid chahta hun

bahut sataya hai maKHluq ne teri ya-rab

sukun ab pae-hazrat-farid chahta hun