dildar usko KHwah dil-azar kuchh kaho

dildār us ko ḳhvāh dil-āzār kuchh kaho

suntā nahīñ kisū kī mirā yaar kuchh kaho

ġhamza adā nigāh tabassum hai dil kā mol

tum bhī agar ho us ke ḳharīdār kuchh kaho

shīrīñ ne kohkan se mañgā.ī thī jū-e-shīr

gar imtihāñ hai us se bhī dushvār kuchh kaho

har aan aa mujhī ko satāte ho nāseho

samjhā ke tum use bhī to yak-bār kuchh kaho

ai sākinān-e-kunj-e-qafas sub.h ko sabā

sunte haiñ jā.egī sū-e-gulzār kuchh kaho

aalam kī guftugū se to aatī hai bū-e-ḳhūñ

banda hai ik nigah kā gunahgār kuchh kaho

'saudā' muvāfaqat kā sabab jāntā hai yaar

samjhe muḳhālif us ko kuchh aġhyār kuchh kaho

dildar us ko KHwah dil-azar kuchh kaho

sunta nahin kisu ki mera yar kuchh kaho

ghamza ada nigah tabassum hai dil ka mol

tum bhi agar ho us ke KHaridar kuchh kaho

shirin ne kohkan se mangai thi ju-e-shir

gar imtihan hai us se bhi dushwar kuchh kaho

har aan aa mujhi ko satate ho naseho

samjha ke tum use bhi to yak-bar kuchh kaho

ai sakinan-e-kunj-e-qafas subh ko saba

sunte hain jaegi su-e-gulzar kuchh kaho

aalam ki guftugu se to aati hai bu-e-KHun

banda hai ek nigah ka gunahgar kuchh kaho

'sauda' muwafaqat ka sabab jaanta hai yar

samjhe muKHalif us ko kuchh aghyar kuchh kaho