hum ko wafa ki rah mein kya kya nahin mila

ham ko vafā kī raah meñ kyā kyā nahīñ milā

soz-e-jigar milā kahīñ qalb-e-hazīñ milā

dīvāngān-e-‘ishq kī duniyā hī aur hai

husn-e-ġhazāl ruuh meñ gosha-nashīñ milā

dekhā ye dil to aap kī hī dastaras meñ hai

rakh kar kahīñ ga.e the magar ye kahīñ milā

kitnī gulāb sūrateñ shahr-e-adā meñ thiiñ

sach pūchhiye to aap sā koī nahīñ milā

daur-e-visāl meñ baḌe hī fāsle rahe

‘ahd-e-firāq meñ hameñ dil se qarīñ milā

'faizī' malāl-e-'umr hai chāhat kā phuul bhī

pohñchā kisī ke haath meñ ham ko nahīñ milā

hum ko wafa ki rah mein kya kya nahin mila

soz-e-jigar mila kahin qalb-e-hazin mila

diwangan-e-‘ishq ki duniya hi aur hai

husn-e-ghazal ruh mein gosha-nashin mila

dekha ye dil to aap ki hi dastaras mein hai

rakh kar kahin gae the magar ye kahin mila

kitni gulab suraten shahr-e-ada mein thin

sach puchhiye to aap sa koi nahin mila

daur-e-visal mein baDe hi fasle rahe

‘ahd-e-firaq mein hamein dil se qarin mila

'faizi' malal-e-'umr hai chahat ka phul bhi

pohncha kisi ke hath mein hum ko nahin mila